رەسەيدىڭ ۋكرايناعا اسكەري شاپقىنشىلىعى مەن ۋكراينانىڭ شىعىس ايماقتارىن باسىپ الۋ كەزىندە حەرسونداعى ەكىنشى دۇنيەجۇزىلىك سوعىس قۇجاتتارى ساقتالعان مۇراعات، باسقا دا شاعىن مۇراعاتتار مەن مەكەمەلەر تونالدى، كوپتەگەن تاريحي قۇجاتتار جويىلدى، دەپ حابارلايدى «ادىرنا» ۇلتتىق پورتالى DW سايتىنا سىلتەمە جاساپ.
قازىر ۋكراينانىڭ باسقا مۇراعاتتارى دا وسىنداي قيىندىقتاردى باستان كەشىرۋدە.
«رەسەي باسىپ العانعا دەيىن دە ۋكراينا مۇراعاتتارىنىڭ جاعدايى جاقسى بولعان جوق»، - دەلىنگەن حابارلامادا.
اۆتورلار ۋكراين مۇراعاتىنىڭ قىزمەتكەرلەرىمەن سۇحباتتا نەگىزگى پروبلەمالاردى اتاپ كورسەتكەن: كوللەكتسيالاردى ساقتاۋ مەن جاڭا جوبالاردى جۇزەگە اسىرۋ ءۇشىن قارجىلاندىرۋدىڭ جەتكىلىكسىزدىگى، ماتەريالداردى باقىلاپ، كۇتۋ ءۇشىن ادام رەسۋرستارىنىڭ جەتىسپەۋشىلىگى، سونداي-اق بيۋروكراتيالىق قيىندىقتار.
نەمىس ساراپشىلارى: «سوعىس ينفراقۇرىلىمعا، عيماراتتارعا جانە مۇراعات ماتەريالدارىنا اسەر ەتىپ، جاپپاي قيراۋعا اكەلدى»، - دەيدى. بۇل رەتتە ولار بۇۇ-نىڭ ءبىلىم، عىلىم جانە مادەنيەت اگەنتتىگى – يۋنەسكو-نىڭ 2023 جىلدىڭ ءساۋىر ايىنداعى دەرەكتەرىنە سىلتەمە جاساپ، ۋكرايناداعى 251 مادەني نىسانعا، ونىڭ ىشىندە 22 مۇراجايعا، 12 كىتاپحاناعا جانە 1 مۇراعاتقا كەلتىرىلگەن سوعىس زالالدارىن تىركەدى.
ساراپشىلار ۋكرايندىق مۇراعاتتاردى تسيفرلاندىرۋدى، سونداي-اق وسى جۇمىس بويىنشا ءوز كومەكتەرىن ۇسىندى.
«جابدىقتىڭ، قىزمەتكەرلەردىڭ نەمەسە اقشانىڭ جەتىسپەۋشىلىگىنەن فيزيكالىق جازبالاردى ساقتاۋ قيىن. بيلىك ۇيلەرىنەن ايىرىلعان ادامداردى باسپانامەن قامتاماسىز ەتۋگە نازار اۋدارادى، سوندىقتان ولار ءۇشىن مۇراعاتتاردى جوندەۋ ءبىرىنشى ورىندا ەمەس»، - دەيدى ارولسەن مۇراعات ورتالىعى.
«ادىرنا» ۇلتتىق پورتالى
