ماسكەۋدە قازاقستاننىڭ اتوم ەنەرگەتيكاسى اگەنتتىگىنىڭ توراعاسى الماسادام ساتقاليەۆ پەن «روساتوم» مەملەكەتتىك كورپوراتسياسىنىڭ باس ديرەكتورى الەكسەي ليحاچەۆ اتوم سالاسىنداعى ىنتىماقتاستىقتى جانە قازاقستانداعى «بالقاش» اتوم ەلەكتر ستانتسياسىن سالۋ جوباسىن تالقىلادى. بۇل تۋرالى اگەنتتىك ءباسپاسوز قىزمەتى ي الىمدەدى، دەپ حابارلايدى "ادىرنا".
تاراپتار اتوم سالاسىن دامىتۋداعى ءوزارا ءىس-قيمىلدىڭ كەڭ اۋقىمدى ماسەلەلەرىن قاراستىردى، سونىڭ ىشىندە «بالقاش» اەس جوباسىن ىسكە اسىرۋ دا بار.
اگەنتتىك مالىمەتىنشە، كەزدەسۋدە اتوم سالاسىنا ماماندار دايارلاۋ، عىلىمي-تەحنيكالىق ىنتىماقتاستىقتى كەڭەيتۋ، سونداي-اق قازاقستاندىق كومپانيالاردى اتوم جوبالارىنا تارتۋ ماسەلەلەرىنە ەرەكشە نازار اۋدارىلعان.
ء«بىز وسى ستانتسيانى سالۋ كەزىندە جەرگىلىكتەندىرۋ جانە قازاقستاندىق كومپانيالاردى تارتۋ، كادر دايارلاۋ ماسەلەلەرىن، سونداي-اق جالپى ۇزاق مەرزىمدى ىنتىماقتاستىقتى تالقىلادىق. بارلىق باعىت بويىنشا ورتاق تۇسىنىستىككە قول جەتكىزىلدى. ەكى ەلدىڭ مۇددەسىنە جانە ستراتەگيالىق سەرىكتەستىك سيپاتىنا تولىق ساي كەلەتىن نەگىزگى تاسىلدەر قالىپتاستىرىلدى»، - دەدى ساتقاليەۆ.
كەلىسسوز قورىتىندىسى بويىنشا ليحاچەۆ «بالقاش» اەس جوباسىن ءساتتى جۇزەگە اسىرۋ ءۇشىن جان-جاقتى الدىن الا دايىندىق قاجەت ەكەنىن اتاپ ءوتتى. ونىڭ ىشىندە تاڭدالعان اۋماقتى ينجەنەرلىك زەرتتەۋ جانە تابيعي-كليماتتىق جاعدايلاردى باعالاۋ بار.
«وندىرىستىك باعدارلاما ءىس جۇزىندە ورىندالۋدا، الايدا الاڭ بويىنشا كەمىندە ءبىر جىل باقىلاۋ قاجەت. سونىڭ نەگىزىندە بارلىق قاجەتتى ەسەپتەر دايىندالىپ، جوبا ناقتى وسى جەردىڭ تابيعي، گەولوگيالىق جانە اۋا رايى جاعدايلارىنا ساي جۇزەگە اسىرىلادى»، - دەدى «روساتوم» باسشىسى.
ول سونداي-اق «بالقاش» اەس جوباسى تاڭدالعان اۋماقتىڭ ەرەكشەلىكتەرىن ەسكەرە وتىرىپ جانە رەسەيدىڭ اتوم ەنەرگەتيكاسىنداعى تەحنولوگيالىق شەشىمدەر نەگىزىندە جاسالاتىنىن ايتتى.
تاراپتار بەيبىت اتوم تەحنولوگيالارىن پايدالانۋ سالاسىنداعى كونسترۋكتيۆتى ديالوگتى جالعاستىرۋعا جانە ىنتىماقتاستىقتى كەڭەيتۋگە دايىن ەكەنىن ءبىلدىردى.
