3-8 قىركۇيەك ارالىعىندا الماتىدا توعىزىنشى رەت BAIQONYR حالىقارالىق كينوفەستيۆالى وتەدى. بيىلعى فەستيۆال قاتىسۋشىلار اراسىندا جوعارى قىزىعۋشىلىق تۋدىرىپ، وعان قاتىسۋعا 670-تەن استام ءوتىنىم كەلىپ ءتۇستى.
Baiqonyr – بۇل ورتالىق ازياداعى دەبيۋتتىك جانە قىسقامەترلى فيلمدەر بويىنشا وتەتىن بىرەگەي حالىقارالىق فەستيۆال. بيىل فەستيۆال رەسمي دەمەۋشىلەرىمىزدىڭ ءبىرى - MEGA Alma-Ata ساۋدا ورتالىعىنداعى Chaplin Cinemas كينوتەاترىندا وتەدى.
فەستيۆال ءۇش باعىتتى قامتيدى:
- قىسقامەترلى كوركەم فيلمدەر حالىقارالىق بايقاۋى،
- كوركەم جانە دەرەكتى فيلمدەر ۇلتتىق بايقاۋى،
- ءۇشىنشى باعىت – بۇعان دەيىن «ويىن جانرىنداعى دەبيۋتتىك فيلمدەر» باعدارلاماسى رەتىندە وتكىزىلىپ كەلگەن باعىت، بيىل بولەك بايقاۋ رەتىندە قاراستىرىلادى.
كينوساراپشى جانە فەستيۆالدىڭ باعدارلاما ديرەكتورى ەرجان جۇمابەكوۆتىڭ ايتۋىنشا، 20 ەلدەن كەلىپ تۇسكەن 670 ءوتىنىمنىڭ ىشىنەن فەستيۆالدە بايقاۋ باعدارلاماسىنا قاتىساتىن 33 فيلم ىرىكتەلىپ الىنعان. بايقاۋعا قازاقستان، گرۋزيا، ءازىربايجان، ارمەنيا، وزبەكستان، تاجىكستان، قىرعىزستان جانە رەسەي سياقتى ەلدەردىڭ وكىلدەرى قاتىستى.
ۇلتتىق بايقاۋعا قازاقستاننان 150-دەن استام ءوتىنىم ءتۇسىپ، ونىڭ ىشىندە 17 فيلم بايقاۋ باعدارلاماسىنا وتكەن.
«قاتىسۋشىلار اراسىندا ستۋدەنتتەر دە، بەلگىلى جاس رەجيسسەرلەر دە بار. فيلمدەر ءتۇرلى جانردى قامتىعانى قۋانتادى. الەۋمەتتىك درامالارمەن قاتار، حوررور، ميۋزيكل، تريللەر جانرىندا تۇسىرگەن فيلمدەر دە بار. بايقاۋعا قاتىسقان فيلمدەردە كوبىنە ءوزىن-ءوزى تانۋ جانە وتباسى قۇندىلىقتارى تاقىرىپتارى قامتىلعان»، – دەيدى ەرجان جۇمابەكوۆ.
3 قىركۇيەكتە فەستيۆال قازاقستاندىق رەجيسسەر كەنجەبەك شايقاقوۆتىڭ «ايقاي» فيلمىمەن اشىلادى. ءفيلمنىڭ حالىقارالىق پرەمەراسى پۋسان حالىقارالىق كينوفەستيۆالىندە وتكەن.
بيىلعى باعدارلامانىڭ ەرەكشەلىگى– تولىقمەترلى فيلمدەردىڭ دەبيۋتتىك بايقاۋى ەنگىزىلىپ وتىر.
«بايقاۋ الدىندا ءبىز فيلمدەردى ىرىكتەپ، پانورامالىق كورسەتىلىمدەر وتكىزدىك. باستاماسى جاقسى بولادى دەپ ۇمىتتەنەمىز جانە بايقاۋعا قىسقا جانە تولىقمەترلى فيلمدەر قاتىسادى»، - دەدى جۇمابەكوۆ.
بايقاۋ باعدارلاماسىنداعى فيلمدەردى كورسەتۋدەن باسقا فەستيۆالدە تانىمدىق ءىس-شارالار دا وتكىزىلەدى:
- شەبەرلىك ساباقتارى، شىعارماشىلىق كەزدەسۋلەر جانە جەتەكشى كينورەجيسسەرلەردىڭ اۆتورلىق دارىستەرى،
- كينو ماماندارىمەن پانەلدىك سەسسيا،
- كينوفەستيۆال لاۋرەاتتارىمەن پابليك-توك
Baiqonyr كينوفەستيۆالى توعىز جىلدان بەرى مەملەكەتتىڭ قارجىلىق قولداۋىنسىز ۇيىمداستىرىلىپ، كينويندۋستريانى دامىتۋعا ۇلەس قوسىپ كەلەدى. سونىمەن قاتار، فەستيۆال دارىندى رەجيسسەرلەرگە قولداۋ كورسەتىپ، جەرگىلىكتى اۆتورلاردىڭ الەمدىك كينو قاۋىمداستىعىنا شىعۋعا مۇمكىندىك بەرەتىن پلاتفورما ۇسىنىپ كەلەدى. وسى جىلدار ىشىندە قازاقستاننىڭ جانە باسقا ەلدەردىڭ 102 قاتىسۋشىسى فەستيۆال لاۋرەاتى اتاندى.
فەستيۆال تمد-عا قاتىسۋشى مەملەكەتتەردىڭ مەملەكەتارالىق گۋمانيتارلىق ىنتىماقتاستىعى قورىنىڭ قولداۋىمەن وتەدى.
