1 جەلتوقساننان باستاپ قازاقستاندىقتار ءۇشىن بايقوڭىر قالاسىنا كىرىپ-شىعۋ ءتارتىبى جەڭىلدەيدى، دەپ حابارلايدى «ادىرنا» ءتىلشىسى Qyzylorda تەلەارناسىنا سىلتەمە جاساپ.
ەندى تۇرعىندارعا شاھارعا كىرىپ-شىعۋ ءۇشىن الدىن الا رۇقسات الىپ، قۇجات تاپسىرمايدى.
«بەلگىلەنگەن ءتارتىپ بويىنشا بايقوڭىرعا قوناققا نەمەسە ءىس-ساپارعا كەلەتىن كەز كەلگەن ادام 10 كۇن بۇرىن ءوتىنىش بەرۋى كەرەك. كەلىسىمگە وزگەرىس ەنگىزىلدى. ۇزاق ۋاقىت زەرتتەۋدەن كەيىن شەشىم قابىلداندى. پيلوتتىق رەجيمدە 1 جەلتوقساننان باستاپ قازاقستان ازاماتتارىنا وتكىزۋ پۋنكتىندە رۇقساتتامالار بەرىلەدى»،—دەدى قىزىلوردا وبلىسى اكىمىنىڭ ورىنباسارى جانە پرەزيدەنتتىڭ «بايقوڭىر» كەشەنىندەگى ارنايى وكىلى قايرات نۇرتاي.
ايتا كەتەيىك، بايقوڭىر – رەسەيگە ۇزاق مەرزىمگە جالعا بەرىلگەن قازاقستاندىق قالا. قالاعا كىرىپ-شىعۋدىڭ دا ءوز ءتارتىبى بار. قالا اۋماعىنا پليتالار، جان-جاعىنا بەينەكامەرالار قويىلعان.
قولدانىستاعى مەملەكەتارالىق كەلىسىمدەرگە سايكەس، «بايقوڭىر» كەشەنى (ونىڭ قۇرامىنا عارىش ايلاعى مەن قالا كىرەدى) 2050 جىلعا دەيىن رەسەي فەدەراتسياسىنا جالعا بەرىلدى.
