3-8 qyrkúıek aralyǵynda Almatyda toǵyzynshy ret BAIQONYR halyqaralyq kınofestıvali ótedi. Bıylǵy festıval qatysýshylar arasynda joǵary qyzyǵýshylyq týdyryp, oǵan qatysýǵa 670-ten astam ótinim kelip tústi.
Baiqonyr – bul Ortalyq Azııadaǵy debıýttik jáne qysqametrli fılmder boıynsha ótetin biregeı halyqaralyq festıval. Bıyl festıval resmı demeýshilerimizdiń biri - MEGA Alma-Ata saýda ortalyǵyndaǵy Chaplin Cinemas kınoteatrynda ótedi.
Festıval úsh baǵytty qamtıdy:
- Qysqametrli kórkem fılmder Halyqaralyq baıqaýy,
- Kórkem jáne derekti fılmder Ulttyq baıqaýy,
- Úshinshi baǵyt – buǵan deıin «oıyn janryndaǵy debıýttik fılmder» baǵdarlamasy retinde ótkizilip kelgen baǵyt, bıyl bólek baıqaý retinde qarastyrylady.
Kınosarapshy jáne festıvaldiń baǵdarlama dırektory Erjan Jumabekovtiń aıtýynsha, 20 elden kelip túsken 670 ótinimniń ishinen festıvalde baıqaý baǵdarlamasyna qatysatyn 33 fılm iriktelip alynǵan. Baıqaýǵa Qazaqstan, Grýzııa, Ázirbaıjan, Armenııa, Ózbekstan, Tájikstan, Qyrǵyzstan jáne Reseı sııaqty elderdiń ókilderi qatysty.
Ulttyq baıqaýǵa Qazaqstannan 150-den astam ótinim túsip, onyń ishinde 17 fılm baıqaý baǵdarlamasyna ótken.
«Qatysýshylar arasynda stýdentter de, belgili jas rejısserler de bar. Fılmder túrli janrdy qamtyǵany qýantady. Áleýmettik dramalarmen qatar, horror, mıýzıkl, trıller janrynda túsirgen fılmder de bar. Baıqaýǵa qatysqan fılmderde kóbine ózin-ózi taný jáne otbasy qundylyqtary taqyryptary qamtylǵan», – deıdi Erjan Jumabekov.
3 qyrkúıekte festıval qazaqstandyq rejısser Kenjebek Shaıqaqovtyń «Aıqaı» fılmimen ashylady. Fılmniń halyqaralyq premerasy Pýsan halyqaralyq kınofestıvalinde ótken.
Bıylǵy baǵdarlamanyń ereksheligi– tolyqmetrli fılmderdiń debıýttik baıqaýy engizilip otyr.
«Baıqaý aldynda biz fılmderdi iriktep, panoramalyq kórsetilimder ótkizdik. Bastamasy jaqsy bolady dep úmittenemiz jáne baıqaýǵa qysqa jáne tolyqmetrli fılmder qatysady», - dedi Jumabekov.
Baıqaý baǵdarlamasyndaǵy fılmderdi kórsetýden basqa festıvalde tanymdyq is-sharalar da ótkiziledi:
- Sheberlik sabaqtary, shyǵarmashylyq kezdesýler jáne jetekshi kınorejısserlerdiń avtorlyq dáristeri,
- Kıno mamandarymen paneldik sessııa,
- Kınofestıval laýreattarymen pablık-tok
Baiqonyr kınofestıvali toǵyz jyldan beri memlekettiń qarjylyq qoldaýynsyz uıymdastyrylyp, kınoındýstrııany damytýǵa úles qosyp keledi. Sonymen qatar, festıval daryndy rejısserlerge qoldaý kórsetip, jergilikti avtorlardyń álemdik kıno qaýymdastyǵyna shyǵýǵa múmkindik beretin platforma usynyp keledi. Osy jyldar ishinde Qazaqstannyń jáne basqa elderdiń 102 qatysýshysy festıval laýreaty atandy.
Festıval TMD-ǵa qatysýshy memleketterdiń Memleketaralyq gýmanıtarlyq yntymaqtastyǵy qorynyń qoldaýymen ótedi.
