ءال-فارابي اتىنداعى قازاق ۇلتتىق ۋنيۆەرسيتەتىنەن تاعى دا داۋ شىقتى. بۇل جولى وقۋ ورنىندا مەديتسينا فاكۋلتەتىن 6 جىل وقىعان تۇلەكتەر رەزيدەنتۋراعا تۇسە الماي قالعانىن ايتىپ، الاڭعا جينالدى، دەپ حابارلايدى "ادىرنا" ۇلتتىق پورتالى كتك تەلەارناسىنا سىلتەپ.
6 جىل بويى ءال-فارابي اتىنداعى قازاق ۇلتتىق ۋنيۆەرسيتەتىندە مەديتسينا فاكۋلتەتىندە ءبىلىم العان ستۋدەنتتەر رەزيدەنتۋراعا تۇسە الماعان.
بەس جىلدىق باكالاۆردى، كەيىن ءبىر جىلدىق ينتەرناتۋرانى بىتىرگەن تۇلەكتەر بيىل رەزيدەنتۋراعا تۇسە الماعان. سەبەبى وزگە مەديتسينالىق جوعارى وقۋ ورىندارى ۇلتتىق ۋنيۆەرسيتەت تۇلەكتەرىنىڭ ينتەرناتۋرانى جەتكىلىكسىز وقىعانىن مالىمدەگەن.
ء“بىر جىلدىق ينتەرناتۋرالارىڭىز جارامسىز، ەكىنشى جىل بارىپ وقىپ كەلىڭىزدەر” دەپ وتىر. ديپلوم قولدارىندا، مەملەكەتتىك ۇلگىدە. ديپلوم مەملەكەتتىك قۇجات، ونى قوقىسقا تاستاپ، ەكىنشى جىل وقي بەرەيىك دەگەن نارسە دۇرىس ەمەس، پروتسەدۋرا بۇزىلادى، زاڭ بۇزىلادى”، – دەدى ۋنيۆەرسيتەت تۇلەگى ايدانا پازىلبەك.
ۇلتتىق ۋنيۆەرسيتەتتى كەلەسى جىلى تاعى 80 ستۋدەنت تامامداماق. ولار قازىردەن دابىل قاعىپ وتىر. ويتكەنى رەزيدەنتۋراعا ءتۇسۋ مەديتسينا ستۋدەنتتەرى ءۇشىن اسا ماڭىزدى بولىپ وتىر.
“مەنىڭ بەس جىلدىق وقۋىم زايا كەتپەك. سەبەبى ار جاعىندا مەن جالپى تاجىريبەلىك دارىگەر بولۋعا عانا قۇقىم قالىپ تۇر. جىلىنا 1 ميلليون 70 مىڭ تولەدىم. ينتەرناتۋرادا باعا ودان دا ۇلكەيەدى، 1 ميلليون 700 مىڭ سۇرايدى. مەن سونى تولەۋىم كەرەك. ونىڭ ۇستىنە ودان كەيىن جىلدار بويى تولەنگەن اقشاممەن ءارى قاراي مەن جەكە ماماندىق الا المايمىن”، – دەپ دابىل قاقتى تۇلەكتەردىڭ ءبىرى ءاليا قۇدايبەرگەن.
سويتسە قازاق ۇلتتىق ۋنيۆەرسيتەتى جاستاردى مەديتسينالىق ءبىلىم بەرۋدىڭ جاڭا ستاندارتىمەن وقىتىپتى. سوعان سايكەس باكالاۆردان كەيىن وقىلاتىن ينتەرناتۋرا ءبىر جىلعا قىسقارتىلعان. ستۋدەنتتەر ءبىلىمىن جەتكىلىكتى دەپ ساناعان ۋنيۆەرسيتەت باسشىلىعى دەنساۋلىق ساقتاۋ مينيسترلىگىنە حات جولداعان.
“حات جازدىق، ناتيجەسىن كۇتىپ وتىرمىز. ەگەر دە مينيسترلىكتىڭ “وقىت” دەگەن شەشىمى بولسا، وندا ءبىز تاعى ءبىر جىل وقىتۋعا دايىنبىز. سەبەبى بالالار ءبارى ءبىر جىل اقىلى تۇردە وقىدى. ەندى تاعى ءبىر جىل وقىت دەسە، وقىتامىز”، – دەدى قازۇۋ اكادەميالىق ماسەلەلەر جونىندەگى پرورەكتورى التاي قازماعامبەتوۆ.
ال دەنساۋلىق ساقتاۋ مينيسترلىگى بولاشاق دارىگەرلەرگە مەرزىمىنەن بۇرىن ديپلوم بەرگەن ۋنيۆەرسيتەتتى ايىپتادى.
ء“بىلىم تۋرالى زاڭعا سايكەس، ولار ۋنيۆەرسيتەتتى وقۋعا تۇسكەن كەزدەگى باعدارلاما بويىنشا اياقتاۋى كەرەك. سول كەزدە 7 جىل وقۋى كەرەك دەپ بەلگىلەنگەن بولسا، سول 7 جىلدى تولىققاندى وقىپ شىعۋعا تيىس. كەيىنىرەك قولدانىسقا ەنگەن باعدارلامانىڭ بۇل تۇلەكتەرگە قاتىسى جوق. سوندىقتان ينتەرناتۋرانىڭ تاعى ءبىر جىلىن وقىپ كەلسىن. سودان كەيىن عانا رەزيدەنتۋراعا تۇسە الادى”، – دەدى دسم عىلىم جانە ادامي رەسۋرستار دەپارتامەنتىنىڭ مەديتسينالىق ءبىلىم باسقارماسىنىڭ باسشىسى اسەت ىزدەنوۆ.
