پاۆلودار وبلىسىندا شۇڭقىرعا قۇلاپ كەتكەن اۆتوبۋس اپاتىنا «مايقايىڭالتىن» كەن ورنى كىنالى ەكەنى راستالدى. بۇل تۋرالى بۇگىن، 30 شىلدەدە استانا قالالىق سوتىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«استانا مامانداندىرىلعان اۋدانارالىق اكىمشىلىك سوتىنىڭ 2024 جىلعى 16 ساۋىردەگى شەشىمىن وزگەرىسسىز قالدىردى. جازاتايىم وقيعا جۇمىس ۋاقىتىندا «كااقق روش» جشس قىزمەتكەرلەرىنىڭ ەڭبەك مىندەتتەرىن ورىنداۋ كەزىندە بولعان. اكتىمەن جۇمىس بەرۋشىنىڭ كىناسى 100 پايىز انىقتالدى»،—دەلىنگەن حابارلامادا.
الايدا «مايقايىڭالتىن» اق جازاتايىم وقيعادا ءوزىنىڭ كىناسىن جوققا شىعارىپ، بۇل اكتىنى داۋلاعان.
جازاتايىم وقيعا «مايقايىڭالتىن» قاۋىپتى وندىرىستىك وبەكتىسىندە تەحنولوگيالىق جولدىڭ جوعارعى قاباتىنىڭ شاحتانىڭ تازارتۋ كەڭىستىگىنە قۇلاۋى جانە «كااقق روش» جشس قۇتقارۋشىلارىمەن بىرگە اۆتوبۋستىڭ قۇلاۋى سالدارىنان بولعانى انىقتالدى.
سوت ارنايى كوميسسيا اكتىدە «مايقايىڭالتىن» كەن ورنىنىڭ 100% كىناسىن نەگىزدى تۇردە كورسەتتى دەگەن قورىتىندىعا كەلدى، ويتكەنى بولعان جازاتايىم وقيعا تالاپكەردىڭ وندىرىستىك قىزمەتىمەن تىكەلەي بايلانىستى بولىپ وتىر»،—دەلىنگەن حابارلامادا.
ەلوردا سوتتارى ارنايى تەرگەۋ اكتىسىنىڭ داۋلى قورىتىندىلارى زاڭدى جانە نەگىزدى دەپ تاپتى، ال «مايقايىڭالتىن»تالابى قاناعاتتاندىرىلمادى.
ەسكە سالايىق، بيىل 4 قاڭتاردا «مايقايىڭالتىن» كومپانياسى كەنىشىنىڭ شۇڭقىرىنا اۆتوبۋس قۇلاعان بولاتىن. سالدارىنان 4 قۇتقارۋشى قازا تاپتى.
