جەلىدە حيدجابقا قاتىستى پىكىر ايتقانى ءۇشىن ءانشى ۇلانعاسىر قاميگە باس بوستاندىعىنان ايىرىلۋ قاۋپى ءتوندى، دەپ حابارلايدى "ادىرنا" ۇلتتىق پورتالى ينفورمبيۋروعا سىلتەپ.
پىكىرى قوعامدا ۇلكەن داۋ تۋدىرعان ءانشىنىڭ سوزدەرىنە قۇقىقتىق باعا بەرىلمەك. قوعام بەلسەندىسى سايدا سيسەمباەۆا ىشكى ىستەر مينيسترلىگىنە ءانشىنىڭ ۇستىنەن ارىز تۇسىرگەنىن جەلىدە حابارلادى.
بەلسەندى قامي قىلمىستىق كودەكستىڭ 174 بابىن بۇزدى دەپ سانايدى. ياعني الەۋمەتتىك، گەندەرلىك، ءدىني الاۋىزدىقتى قوزدىرعان. ءارى مۇنى ايەلدەرگە جاسالعان زورلىق-زومبىلىقتى اقتاۋ ارەكەتى دەپ اتادى.
وسىعان بايلانىستى زاڭگەر زاڭنىڭ بارىنە ورتاق ەكەنىن العا تارتتى.
“وتكەندە ارتىستەرىمىز – قايرات نۇرتاس بولسىن، باسقانىڭ بولسىن جازاعا تارتىلعانىن كورسەتىپ جاتقانى وتە دۇرىس. سەبەبى ادامدار “بۇدان قۇتىلىپ كەتۋگە بولادى عوي، باسقا تاسىلدەرى بار” دەگەن ويدان اۋلاق بولىپ، قانداي دا ءبىر اكىمشىلىك، قانداي دا ءبىر زاڭعا قايشى ارەكەت جاساعاندا، وعان ءتيىستى جازا بار ەكەنىن بىلەدى”، – دەدى زاڭگەر نۇربولات يبراەۆ.
ال اكتەر ۋاليبەك ءابدىرايىموۆ ونەردە جۇرگەن ءىزباسارلارىنىڭ جازا ارقالاۋى ەل تالقىلايتىن، دۇرلىگەتىن دۇنيە ەمەس دەپ سانايتىنىن جەتكىزدى.
“15 جىلعا قامالىپ شىققان ادام سياقتى. ەندى ءبىر سۇمدىق. ادامنىڭ كۇلكىسى كەلەدى. 15 كۇنگە قامالىپ شىعىپ كەلە جاتسا، الدىنان اكە-شەشەلەرى كۇتىپ جاتىر. ءبىر سوعىستان زارداپ شەگىپ، وسى قازاقستان ءۇشىن جانىن پيدا قىلعانداي. نەمەسە ۇشاقتا توبەلەسىپ، سول ۇشاقتاعى تەرروريستتەردى ۇستاپ سودان قامالعان بالانى شىعارعانداي. قۇقىق قورعاۋ ورگانى ورتاق ەكەنىن ءبىر ءبىلدىرىپ قويدى. زاڭ ورتاق. ءتارتىپ بۇزباۋ كەرەك”، – دەدى ونەر يەسى ۋاليبەك ءابدىرايىموۆ.
