Jelide hıdjabqa qatysty pikir aıtqany úshin ánshi Ulanǵasyr Qamıge bas bostandyǵynan aıyrylý qaýpi tóndi, dep habarlaıdy "Adyrna" ulttyq portaly Informbıýroǵa siltep.
Pikiri qoǵamda úlken daý týdyrǵan ánshiniń sózderine quqyqtyq baǵa berilmek. Qoǵam belsendisi Saıda Sısembaeva ishki ister mınıstrligine ánshiniń ústinen aryz túsirgenin jelide habarlady.
Belsendi Qamı qylmystyq kodekstiń 174 babyn buzdy dep sanaıdy. Iaǵnı áleýmettik, genderlik, dinı alaýyzdyqty qozdyrǵan. Ári muny áıelderge jasalǵan zorlyq-zombylyqty aqtaý áreketi dep atady.
Osyǵan baılanysty zańger zańnyń bárine ortaq ekenin alǵa tartty.
“Ótkende ártisterimiz – Qaırat Nurtas bolsyn, basqanyń bolsyn jazaǵa tartylǵanyn kórsetip jatqany óte durys. Sebebi adamdar “budan qutylyp ketýge bolady ǵoı, basqa tásilderi bar” degen oıdan aýlaq bolyp, qandaı da bir ákimshilik, qandaı da bir zańǵa qaıshy áreket jasaǵanda, oǵan tıisti jaza bar ekenin biledi”, – dedi zańger Nurbolat Ibraev.
Al akter Ýálıbek Ábdiraıymov ónerde júrgen izbasarlarynyń jaza arqalaýy el talqylaıtyn, dúrligetin dúnıe emes dep sanaıtynyn jetkizdi.
“15 jylǵa qamalyp shyqqan adam sııaqty. Endi bir sumdyq. Adamnyń kúlkisi keledi. 15 kúnge qamalyp shyǵyp kele jatsa, aldynan áke-shesheleri kútip jatyr. Bir soǵystan zardap shegip, osy Qazaqstan úshin janyn pıda qylǵandaı. Nemese ushaqta tóbelesip, sol ushaqtaǵy terrorıstterdi ustap sodan qamalǵan balany shyǵarǵandaı. Quqyq qorǵaý organy ortaq ekenin bir bildirip qoıdy. Zań ortaq. Tártip buzbaý kerek”, – dedi óner ıesi Ýálıbek Ábdiraıymov.
