قازاقستان پرەمەر-ليگاسىنداعى «ەلىماي» – «ورداباسى» ماتچىنان كەيىن تورەشىلىككە بايلانىستى جانجال ءورشىدى. سەمەيلىك كلۋبتىڭ باس باپكەرى اندرەي كارپوۆيچ باس تورەشى ارمان ەسمۇراتوۆتىڭ دورەكى سويلەپ، قوقان-لوقى كورسەتكەنىن مالىمدەدى. وسىدان كەيىن كلۋب جانكۇيەرلەرى اباي وبلىسىنىڭ اكىمى بەرىك ۋاليگە ۇندەۋ جولدادى، دەپ حابارلايدى «ادىرنا» ءتىلشىسى.
ءوڭىر باسشىسى الەۋمەتتىك جەلىدەگى پاراقشاسىندا جاعدايدىڭ باقىلاۋعا الىنعانىن مالىمدەدى. ايتۋىنشا، جەرگىلىكتى «ەلىماي» فۋتبول كلۋبىنىڭ جانكۇيەرلەرىنەن كوپتەگەن ارىز-وتىنىشتەر كەلىپ ءتۇسىپ جاتىر.
«كوتەرىلگەن ماسەلەلەردىڭ ءمان-جايىن جان-جاقتى زەردەلەپ، ادىلدىك پەن اشىقتىق قاعيداتتارىنىڭ ساقتالۋى ءۇشىن ءتيىستى جۇمىستار جۇرگىزەمىز. وسى ماسەلەگە بايلانىستى قازاقستان فۋتبول فەدەراتسياسىنىڭ پرەزيدەنتى مارات وماروۆپەن سويلەستىم. فەدەراتسيا باسشىسى بارلىق جايتتىڭ مۇقيات قارالاتىنىن، ارنايى كوميسسيا قۇرىلىپ، ماسەلە سوڭىنا دەيىن جەتكىزىلەتىنىن مالىمدەدى. ادىلەتتىلىك جولىنداعى ۇستانىمىمىز وزگەرمەيدى. بۇل ماسەلەنى باقىلاۋدا ۇستايمىز»،–دەدى بەرىك ءۋالي.
ەسكە سالايىق، 14 ماۋسىم كۇنى شىمكەنتتىڭ «ورداباسى» كلۋبى سەمەيلىك «ەلىمايدى» 3:1 ەسەبىمەن جەڭگەن ەدى. كەزدەسۋ سەمەيدەگى «سپارتاك» ستاديونىندا ءوتىپ، الاڭ يەلەرىنىڭ جەڭىلىسىمەن اياقتالعان. الايدا ماتچتان كەيىن تورەشىلىككە قاتىستى داۋ شىقتى. الەۋمەتتىك جەلىلەردە ستاديوننان تۇسىرىلگەن ۆيدەو تارالىپ، وندا جانكۇيەرلەردىڭ تورەشىگە قوقىس لاقتىرعانى بايقالادى. كەيىن تورەشىنىڭ ەموتسياعا بەرىلىپ، جانكۇيەرلەرگە جاۋاپ قايتارعان ساتتەرى دە ءتۇسىپ قالعان.
ويىننان كەيىن «ەلىماي» باپكەرى اندرەي كارپوۆيچ تورەشى ارمان ەسمۇراتوۆتىڭ ارەكەتىنە قاتتى سىن ايتتى. ونىڭ سوزىنشە، ماتچ بارىسىندا باس تورەشى تاراپىنان بەيادەپ سوزدەر ايتىلىپ، ءتىپتى قوقان-لوقى جاسالعان.
«ول چەمپيوناتتىڭ قالعان بولىگىندە «ەلىمايدى» قىسپاققا الاتىنىن جانە جەكە كەزدەسۋدە مەنىمەن «ماسەلەنى باسقاشا شەشەتىنىن» ايتتى»، – دەدى كارپوۆيچ.
باپكەر بۇل جاعدايدى كاسىبي فۋتبولعا جات، ورەسكەل ارەكەت دەپ باعالادى. ول وقيعانىڭ ءتيىستى ورگاندار تاراپىنان تەكسەرىلىپ، رەسمي باعا بەرىلۋىن تالاپ ەتەتىنىن جەتكىزدى.
