دەپۋتات داۋلەت مۇقاەۆتىڭ اناسى ومىردەن ءوتتى، دەپ حابارلايدى "ادىرنا" ۇلتتىق پورتالى.
بۇل تۋرالى جۋرناليست دانا نۇرجىگىت الەۋمەتتىك جەلىدەگى جازباسىندا جاريالادى.
"داۋلەتجان، اينالايىن! كەشە عانا سويلەسىپ، جاعدايىڭدى ءبىلىپ وتىرعان ەدىم. كۇلەكەڭنىڭ دەنساۋلىعى وڭالىپ كەلە جاتىر ما دەپ،ەڭ بولماسا جىلتىراعان ءۇمىت بار ما دەپ ەدىم… قايتەيىن؟! تاعدىر باسقالاي بولدى. ەرسىڭ بە، ايەلسىڭ بە، جاسسىڭ با، كارىسىڭ بە، حان بول، قارا بول انانىڭ ورنى بارىنەن بيىك، بارىنەن بولەك، بارىنەن ەرەك.كۇلەكەڭ مەن تولەۋتاي اكەڭدى سوناۋ “كوشباسشىعا” وزىڭە جانكۇيەر بولىپ ستۋدياعا كەلىپ جۇرگەن كەزىنەن بىلەم عوي. بالاسى ءۇشىن قۇراق ۇشقان اتا-انا. قۇداي بەرگەن ۇل-قىزىنا ءبارىن سارقىپ بەرگەن جانكەشتى ادامدار. قاراپايىم قازاق. كۇلەكەڭ مەيىربيكە، تولەۋتاي اكەي سول اۋرۋحانادا ۇستا. ەكى بالانى جەتكىزىپ، سەمەيدەن استاناعا كوشىپ كەلىپ، ەندى قۇلاشىن كەڭگە جايىپ، نەمەرەسىن مەيىرلەنە ءسۇيىپ وتىراتىن كەزدە… قاپ،قاپ!
توكەڭە قايعىرىپ كوڭىل ايتامىن! جاراسىپ ءومىر سۇرگەن جۇبىنان قاپىدا ايىرىلۋ جان ازابىنىڭ ەڭ اۋىرى. داۋكە،لاۋرا، ارۋكا، تۋعان-تۋىس،دوس باۋىرعا قايعىرا كوڭىل ايتامىن! سابىر…", – دەپ جازدى جۋرناليست.
ايتا كەتەيىك، داۋلەت مۇقاەۆ VIII سايلانعان پارلامەنت ءماجىلىسىنىڭ الەۋمەتتىك-مادەني دامۋ كوميتەتىنىڭ مۇشەسى.
