سەنات دەپۋتاتتارى "تۇركىستان قالاسىنىڭ ەرەكشە مارتەبەسى تۋرالى" زاڭدى ماقۇلدادى، دەپ حابارلايدى "ادىرنا" ۇلتتىق پورتالى.
زاڭعا سايكەس تۇركىستان قالاسىنىڭ تاريح جانە مادەنيەت ەسكەرتكىشتەرى مەن تاريحي-مادەني مۇراسى وبەكتىلەرىن، ونىڭ ىشىندە قوجا احمەت ياساۋي كەسەنەسىنىڭ قورعاۋ ايماقتارىندا ورنالاسقان وبەكتىلەردى باسقارۋدىڭ، ساقتاۋدىڭ جانە ولاردىڭ بۇتىندىگىن ساقتاپ تۇرۋدىڭ ءتيىمدى جۇيەسىن قۇرۋ قاراستىرىلعان.
سونىمەن قاتار، قابىلدانعان زاڭدا تاريح جانە مادەنيەت ەسكەرتكىشتەرىن قورعاۋدى قامتاماسىز ەتۋ جونىندەگى نورمالار، تۇركىستان قالاسىنىڭ ارحەولوگيا جانە ينفراقۇرىلىم ەسكەرتكىشتەرىنىڭ رەزەرۆاتىنا قاتىستى نورمالار ايقىندالادى.
“اتاپ ايتقاندا، قۇرىلىس سالۋدى رەتتەۋ ايماعىندا قۇرىلىس جۇمىستارىن جۇرگىزۋ كەزىندە ساۋلەت كەلبەتى بويىنشا ولاردىڭ تاريح جانە مادەنيەت ەسكەرتكىشتەرىنەن اسىپ كەتۋىنە جول بەرىلمەيدى دەپ كوزدەلەدى. قوجا احمەت ياساۋي كەسەنەسىنىڭ بىرەگەيلىگىن ساقتاۋ جانە ونىڭ اينالاسىنداعى اۋماققا قۇرىلىس سالۋعا جول بەرمەۋ ماقساتىندا كەسەنەنىڭ قورعاۋ ايماعىنىڭ شەكاراسىنان ءبىر ءجۇز مەتر قاشىقتىقتا بيىكتىگى جەتى مەتردەن اساتىن جانە اۋقىمى، ءتۇسى جانە قۇرىلىس ماتەريالدارى بويىنشا تاريح جانە مادەنيەت ەسكەرتكىشتەرىمەن ۇيلەسپەيتىن وبەكتىلەر سالۋعا جول بەرىلمەيدى”، – دەدى سەناتور سۇيىندىك الداشەۆ.
