مەملەكەت باسشىسى ۇكىمەتتىڭ كەڭەيتىلگەن وتىرىسىندا بەرگەن تاپسىرمالارعا ءماجىلىس دەپۋتاتتارى – «AMANAT» پارتياسى فراكتسياسىنىڭ مۇشەلەرى زاڭنامالىق قولداۋ كورسەتەدى. حالىق قالاۋلىلارىنىڭ الدىندا تۇرعان جاڭا مىندەتتەر بۇگىن فراكتسيا جينالىسىندا تالقىلاندى.
ءسوز باسىندا ءماجىلىس سپيكەرى، «AMANAT» توراعاسى ەرلان قوشانوۆ پرەزيدەنت جەدەل شەشۋدى قاجەت ەتەتىن ەلدەگى ەڭ ماڭىزدى ماسەلەلەردى ايقىنداپ بەرگەنىن اتاپ ءوتتى.
«مەملەكەت باسشىسى قاسىم-جومارت توقاەۆ تاپسىرمانى ورىنداۋ كەزىندەگى ءتيىمسىز بيۋروكراتيالىق تاسىلدەردى ناقتى مىسال كەلتىرە وتىرىپ ايتتى. بۇگىندە ناقتى ناتيجەگە باعىتتالعان كاسىبي ءتاسىل قاجەت. بۇل قاعيدانى زاڭ شىعارۋ بارىسىندا دا ۇستانۋىمىز كەرەك. ماجىلىستە ازىرلەنگەن ءاربىر زاڭ پرەزيدەنتتىڭ مەملەكەتتى دامىتۋدى جانە حالىقتىڭ ءال-اۋقاتىن ارتتىرۋدى كوزدەيتىن مىندەتتەرىن جۇزەگە اسىرۋ ءۇشىن جۇمىس ىستەۋى ءتيىس»، – دەدى «AMANAT» پارتياسىنىڭ توراعاسى.
ءماجىلىس سپيكەرى مەملەكەت باسشىسى «AMANAT» ۇسىنعان پرەمەر-ءمينيستردى تاعايىنداعانىن جانە بۇل شەشىم پرەزيدەنتتىڭ پارتياعا دەگەن جوعارى سەنىمىن، ونىڭ ەل بولاشاعىنا جاۋاپكەرشىلىگىن كورسەتەتىنىن ايتتى.
«مەملەكەت باسشىسى ەكونوميكا ءوسىمىن جىل سايىن كەمىندە 6 پايىز دەڭگەيىندە قامتاماسىز ەتۋ جانە 2029 جىلعا قاراي ءجىو كولەمىن 450 ملرد اقش دوللارىنا جەتكىزۋ جونىندە ناقتى مىندەت قويدى. وسىعان بايلانىستى، پارلامەنت دەپۋتاتتارى مەن ۇكىمەت بىرلەسىپ، تىعىز جۇمىس ىستەۋى كەرەك. الدا تۇرعان بارلىق مىندەتتى تەك وسىلاي عانا ءتيىمدى جۇزەگە اسىرۋعا بولادى»، – دەدى ەرلان قوشانوۆ.
پرەزيدەنت تاپسىرمالارىن جۇزەگە اسىرۋ جونىندەگى جيىن بارىسىندا پارتيا فراكتسياسىنىڭ مۇشەلەرى دە ءسوز الدى. اسحات ايماعامبەتوۆ حالىقتى مەملەكەتتىك الەۋمەتتىك قولداۋ تەتىكتەرىن قايتا قاراۋ بويىنشا دەپۋتاتتاردىڭ اتقارىپ جاتقان جۇمىسى تۋرالى، نۇرتاي سابيليانوۆ قۇرىلىس كودەكسىنە جانە مەملەكەتتىك ساتىپ الۋ جونىندەگى جاڭا زاڭ جوباسىنا تۇزەتۋ ەنگىزۋ بويىنشا دەپۋتاتتاردىڭ جۇرگىزىپ جاتقان جۇمىسى تۋرالى، سەرگەي پونومارەۆ سۋ رەسۋرستارىن ءتيىمدى پايدالانۋ جانە سۋ كودەكسىن ازىرلەۋ ماسەلەسى تۋرالى، بولاتبەك ناجمەتدينۇلى كولىك-لوگيستيكالىق الەۋەتتى دامىتۋ جونىندەگى شارالار تۋرالى، بەرىك بەيسەنعاليەۆ بيۋدجەت جانە سالىق ساياساتىنىڭ تيىمدىلىگىن ارتتىرۋ بويىنشا ءوز ۇسىنىسىن ايتتى. ال نۇرجان اشىمبەتوۆ پرەزيدەنتتىڭ اۋىل شارۋاشىلىعى باعىتىنا قاتىستى تاپسىرمالارىن جۇزەگە اسىرۋ جوسپارلارى تۋرالى مالىمەت بەردى.
جيىندى قورىتىندىلاي كەلە ءماجىلىس سپيكەرى ەرلان قوشانوۆ «AMANAT» فراكتسياسى پرەزيدەنت تاپسىرمالارىن جۇزەگە اسىرۋ جۇمىسىن كۇشەيتۋى ءتيىس ەكەنىن اتاپ ءوتتى.
