پنەۆماتيكالىق ۆينتوۆكامەن 10 مەترگە نىسانا كوزدەۋدەن ارالاس كوماندالىق سىندا يسلام ساتپاەۆ پەن الەكساندرا لە وليمپيادا ويىندارىنىڭ قولا جۇلدەگەرى اتاندى، دەپ حابارلايدى «ادىرنا» ءتىلشىسى.
فينالدىق كەزەڭدە وتانداستارىمىز گەرمانيا قۇراماسىمەن كەزدەستى.
العاش رەت وليمپيادا ويىندارىنا قاتىسىپ تۇرعان سپورتشىلار اننا يانسەن مەن ماكسيميليان ۋلبريحتەن باسىم ءتۇستى.
الەكساندرا لە مەن يسلام ساتباەۆتىڭ انالارى پاريجدەگى جازعى وليمپيادا ويىندارىنىڭ ونلاين-ترانسلياتسياسىن ۇزبەي تاماشالادى.
"مەن ارقاشان قىزىمنىڭ جەڭىسىنە سەندىم. ول ون جىلدان بەرى اتىسپەن اينالىسادى. ەرجۇرەك، اكەسىنە ۇقساعان. وكىنىشكە قاراي، جۇبايىم الەكساندرانىڭ 6 جاسىندا دۇنيەدەن وزدى. بۇعان دەيىن قىزىم بۇكىل الەمگە تانىمال بولاتىنىن ايتقان بولاتىن. ءبىز ونى باستاپقىدا ساندرا دەپ اتاعىمىز كەلدى، بىراق سودان كەيىن الەكساندرا دەگەن ەسىمگە توقتالدىق. بارشا قازاقستاندىققا، سونداي-اق جاتتىقتىرۋشىسى ولگا دوۆگۋنعا قولداۋ كورسەتكەنى ءۇشىن شىن جۇرەكتەن العىس ايتامىن. مەنىڭ قىزىم — قازاقستاننىڭ ناعىز پاتريوتى جانە ەشقايدا كوشۋدى جوسپارلامايدى", - دەدى 20 جاستاعى سپورتشىنىڭ اناسى.
يسلام ساتباەۆتىڭ اناسى ءاليا المابەكقىزىنىڭ ايتۋىنشا، 25 جاستاعى قر بىرنەشە دۇركىن چەمپيونى جەتى جاسىنان باستاپ اتىسپەن اينالىسادى.
"مەن ءتۇنى بويى ۇيىقتامادىم، ۋايىمدادىم، ناتيجەلەرى جاريالانعان كەزدە مەن قاتتى قۋاندىم! مەن ۇلىم مەدال الادى دەپ سەندىم، ول وتە ىنتالى جانە ەڭبەكقور”،—دەدى چەمپيوننىڭ اناسى.
ايتا كەتەيىك، قولا جۇلدە جەڭىپ العان قازاق سپورتشىلارى، سونداي-اق ولاردىڭ باپكەرلەرى مەملەكەتتەن 75 مىڭ اقش دوللارىنان الادى. ال وليمپيادا چەمپيونىنا 250 مىڭ اقش دوللارى، كۇمىس جۇلدەگەرگە 150 مىڭ دوللار بەرىلەدى.
