ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ «جاستار رۋحى» جاستار قاناتى ۇيىمداستىرعان استاناداعى بوس جۇمىس ورىندارى جارمەڭكەسىنە قاتىستى. ءىس-شارادا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا جانە استانا قالاسىنىڭ باسشىلىعى بولدى.
بۇگىن بوس ورىندار جارمەڭكەسى ەلوردا ورتالىعىنداعى نۇرجول بۋلۆارىندا اشىق اسپان استىندا ءوتتى. بۇل – استانانىڭ جۇرەگى سانالاتىن جاستار جينالاتىن كورنەكتى ورىن. جارمەڭكەدە مەملەكەتتىك ورگاندار، كۆازيمەملەكەتتىك سەكتور جانە جەكە كومپانيالار اراسىنان 100-گە جۋىق جۇمىس بەرۋشى 2 مىڭعا جۋىق بوس جۇمىس ورنىن ۇسىندى. ولاردىڭ ىشىندە: قازاتومونەركاسىپ، Halyk bank, قازپوشتا، Samruk-Kazyna Construction, «حابار» اگەنتتىگى، قازاقتەلەكوم، Qazaq air جانە باسقا دا ۇيىمدار بار. ءىس-شاراعا 3000-عا جۋىق ادام قاتىستى.
ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ جاستارمەن جانە جۇمىس بەرۋشى ۇيىم وكىلدەرىمەن اڭگىمەلەستى. پارتيا توراعاسى مەملەكەت باسشىسى ءوزىنىڭ سايلاۋالدى باعدارلاماسىندا 2029 جىلعا دەيىن كەمىندە 2,3 ملن جاستى جۇمىسقا ورنالاستىرۋ مىندەتىن قويعانىن اتاپ ءوتتى.
«پرەزيدەنت قاسىم-جومارت توقاەۆ ەڭبەك ادامىنىڭ ەلىمىزدەگى الار ورنىن ەسكەرە وتىرىپ، ولارعا ەرەكشە قۇرمەت كورسەتىلۋ كەرەگىن اتاپ ءوتتى. كوللەدجدەر مەن جوعارى وقۋ ورىندارىن كەشە عانا تامامداعان ەڭبەك ءوتىلى مەن تاجىريبەسى جوق جاستار ءۇشىن جاڭا جۇمىسقا ورنالاسۋ وڭاي ەمەس. مەملەكەتتىڭ، قوعامنىڭ، بيزنەستىڭ مىندەتى – بۇل پروتسەستى جەڭىلدەتۋ، جاس مامانداردى جۇمىسقا ورنالاستىرۋعا جاردەمدەسۋ. وسىلايشا، ءاربىر تۇلەك ەڭبەك نارىعىندا ءوز ورنىن تاۋىپ، ەلدىڭ دامۋىنا مەيلىنشە تەز ۇلەس قوسا باستايدى. «جاستارعا جۇمىس» پارتيالىق جوباسى اياسىندا ۇيىمداستىرىلعان بوس جۇمىس ورىندارى جارمەڭكەسى دە سوعان باعىتتالعان. ەكى جىل قاتارىنان بارلىق وڭىردە وتكىزىلىپ جاتقان جوبا ءوز تيىمدىلىگىن كورسەتۋدە», - دەدى ول.
جارمەڭكە اياسىندا ەڭبەك مينيسترلىگىنىڭ وكىلدەرى كەلۋشىلەرگە «Enbek.kz» ەلەكتروندىق ەڭبەك بيرجاسىنىڭ مۇمكىندىكتەرىن كورنەكى مىسالمەن كورسەتتى. «سامۇرىق-قازىنا» اق وكىلدەرى بوس لاۋازىمدارعا كانديداتتاردى ىرىكتەۋدىڭ اشىقتىعىن ارتتىرۋداعى تسيفرلاندىرۋدىڭ ءرولى تۋرالى، استانا اكىمدىگىنىڭ وكىلدەرى NEET ساناتىنداعى جاستاردى جۇمىسپەن قامتۋعا جاردەمدەسۋ جونىندەگى «Joltap» جوباسىن، ال ەلوردالىق ەڭبەك ورتالىعىنىڭ قىزمەتكەرلەرى تۇلەكتەرگە ارنالعان «العاشقى جۇمىس ورنى» جانە «جاستار پراكتيكاسى» جوبالارى تۋرالى حاباردار ەتىلدى.
«جاستار رۋحى»-نىڭ ۇيىمداستىرۋىمەن ءوتىپ جاتقان بوس جۇمىس ورىندارى جارمەڭكەسى ەلوردادا عانا ەمەس، ەلىمىزدىڭ بارلىق وبلىس ورتالىقتارىندا وتۋدە. وعان كەم دەگەندە 50 مىڭ جاس قازاقستاندىق قاتىسادى دەپ جوسپارلانۋدا. جارمەڭكەلەر ءبىر تەرەزە قاعيداتى بويىنشا جۇمىس ىستەيدى. وندا جۇمىس ىزدەۋشى بوس جۇمىس ورىندارى تۋرالى ءبىلىپ قانا قويماي، ەگجەي-تەگجەيلى مالىمەتتەر دە الا الادى. جارمەڭكەدە جۇمىسقا ورنالاسۋدان باسقا، جاستاردى الەۋمەتتىك قولداۋدىڭ بارلىق مەملەكەتتىك باعدارلاماسى بويىنشا كەڭەس الۋعا بولادى. اتاپ ايتقاندا، باسپانا نەمەسە ەم الۋدان باستاپ، بيزنەس اشۋ جانە ونى مەڭگەرۋگە دەيىن اقپارات بار.
«جاستارعا جۇمىس» جوباسى 2023 جىلدىڭ قاڭتار ايىندا باستاۋ الدى. وسى ۋاقىت ىشىندە قازاقستان بويىنشا ەكى جۇزدەن استام بوس جۇمىس ورىندارى جارمەڭكەسى ءوتتى. وعان 160 مىڭنان استام ادام قاتىسىپ، 30 مىڭ جاس جۇمىسقا ورنالاسۋعا جولداما الدى. ال 30 مىڭعا جۋىق جاس مامان كاسىپكەرلىكتى دامىتۋ ءۇشىن 2,5% جەڭىلدىكپەن نەسيەلەۋ بويىنشا كەڭەس الدى.
سۋرەت: تالعات تانىمباەۆ، اسىلحان سەيداحمەت
