قازاقستاندىق كاسىپكەر قايرات بورانباەۆ الماتىدا تاعى ءبىر فۋتبول كلۋبىن اشۋعا دايىندالىپ جاتىر. بۇل تۋرالى Metaratings.kz جازدى، دەپ حابارلايدى «ادىرنا» ءتىلشىسى.
سايتتىڭ مالىمەتىنشە، كلۋب Almaty United دەپ اتالماق.
«جاڭا كلۋب اشۋداعى باستى ماقسات — قايرات بورانباەۆ باسقاراتىن «قايرات» فۋتبول كلۋبىنىڭ اكادەمياسىنان شىققان تۇلەكتەردى ويىن تاجىريبەسىمەن قامتاماسىز ەتۋ. سپورتشىلار ءوز الاڭىنداعى ماتچتارىن «قايرات» اكادەمياسى نىساندارىنىڭ بىرىندە وتكىزەدى»،—دەپ جازدى باسىلىم.
كلۋبتىڭ باس ديرەكتورى قىزمەتىن «قايراتتىڭ» ەكس-ديرەكتورى، قازىر Player سareer Management فۋتبول اگەنتتىگىنىڭ باسشىسى بايمۇحانوۆ مارات بۇركىتۇلى اتقارادى.
ەسكە سالايىق، وتكەن جىلدىڭ ناۋرىز ايىندا قايرات بورانباەۆتى كۆازيمەملەكەتتىك سەكتوردان اقشا جىمقىرعانى ءۇشىن سەگىز جىلعا سوتتالعان ەدى. كەيىنىرەك ەكىنشى ساتىداعى سوت ونىڭ مەرزىمىن ەكى جىلعا قىسقارتتى. سول كەزدە الماتى اكىمى ەربولات دوساەۆ بيزنەسمەن يەلىگىندەگى «قايرات» فۋتبول كلۋبىنىڭ اكىمدىك مەنشىگىنە بەرىلمەيتىنىن مالىمدەدى.
2023 جىلدىڭ 6 قاراشاسىندا ىشكى ىستەر مينيسترلىگى قايرات بورانباەۆتىڭ بوستاندىققا شىققانىن حابارلادى. بيىلعى جىلدىڭ ماۋسىمىندا كاسىپكەر قايتادان ۇلتتىق پاراليمپيادا كوميتەتىنىڭ باسشىسى بولىپ سايلاندى.
