22 شىلدە كۇنى اقتاۋ قالالىق تۇرعىن-ءۇي كوممۋنالدىق شارۋاشىلىعى ءبولىمى "كوشەدە ىلۋگە ارنالعان 7,5-كە 15 مەترلىك مەملەكەتتىك تۋلاردى ساتىپ الۋ" دەگەن تاقىرىپپەن تەندەر جاريالادى، دەپ حابارلايدى ادىرنا ۇلتتىق پورتالى satypalu.gov.kz/ سايتىنا سىلتەمە جاساپ.
مەملەكەتتىك ساتىپ الۋ قۇنى 6 125 000 تەڭگەنى قۇرايدى. ساتىپ الىناتىن تۋلاردىڭ جالپى سانى - 14 دانا، ياعني ءار تۋدىڭ قۇنى - 437 مىڭ 500 تەڭگە. تەندەر جەڭىمپازى 29 شىلدە كۇنى انىقتالادى. تەحنيكالىق سيپاتتامادا مەملەكەتتىك تۋلاردىڭ كوشەگە ىلىنەتىنى، تۋدى سۋبليماتسيوندى باسۋ تاسىلىمەن پوليتەكس ماتاسىنان دايىنداۋ كەرەكتىگى، كولەمى - 7,5*15 مەتر، قالىڭدىعى 200 گ/م2 كەم ەمەس، تۋدىڭ ءتۇسى ەكى جاعىنان دا 100 پايىز بىردەي بولۋ قاجەتتىگى، كەپىلدىك مەرزىمى 1 جىل ەكەنى جازىلعان.
ارينە، 7,5ح15 مەتر وتە ۇلكەن كولەم. ساتىپ الىناتىن مەملەكەتتىك تۋلاردىڭ قۇنىنا ونى جەتكىزۋ، جۇكتى ءتۇسىرۋ كىرەدى. تاپسىرىستى ورىنداۋشى شارتقا قول قويعاننان كەيىن كۇنتۇزبەلىك 30 كۇن ىشىندە تۋدى اقتاۋ قالاسى، 4 ش/ا قالا اكىمدىگىنە جەتكىزۋى ءتيىس. دەمەك، 6 125 000 تەڭگەگە ساتىپ الىنعان تۋدى تىگەتىن تۇعىردى دايىنداۋ، ورناتۋ، ت.ب جۇمىستارعا باسقا تەندەر جاريالانادى دەگەن ءسوز.
ءبىز اقتاۋ قالالىق تۇرعىن-ءۇي كوممۋنالدىق شارۋاشىلىعى بولىمىنەن "بۇل تۋلاردىڭ ناقتى قاي جەرلەرگە ورناتىلاتىنىن" سۇراپ حات جازدىق. الداعى ۋاقىتتا ولاردان جەتكەن جاۋاپتى قوسىمشا جاريالايتىن بولامىز.
اقان اسىل
"ادىرنا" ۇلتتىق پورتالى
