بۋرابايدا حالىقارالىق فورۋمدار، كورمەلەر مەن ءىرى مادەني ءىس-شارالاردى وتكىزۋگە ارنالعان كوپفۋنكتسيونالدى كونگرەسس-ورتالىقتىڭ قۇرىلىسى باستالدى. جاڭا نىسان ءبىر مەزەتتە مىڭعا دەيىن كورەرمەن قابىلداي الادى. جوبا ءوڭىردىڭ تۋريستىك الەۋەتىن ارتتىرىپ قانا قويماي، جەرگىلىكتى تۇرعىندار ءۇشىن دە مادەني-شىعارماشىلىق ورتالىققا اينالماق.
قۇرىلىسقا رەسمي باستاۋ بەرگەن اقمولا وبلىسىنىڭ اكىمى مارات احمەتجانوۆ جوبانىڭ «حالىقتىق قۇرىلىس» باعدارلاماسى اياسىندا جۇزەگە اسىرىلىپ جاتقانىن اتاپ ءوتتى.
«بۇل جوبانىڭ MICE-ءتۋريزمدى دامىتۋداعى ماڭىزى ەرەكشە. كونگرەسس-ورتالىق ينۆەستيتسيا تارتۋعا، شاعىن جانە ورتا بيزنەستى، قوعامدىق تاماقتاندىرۋ، كولىك جانە قىزمەت كورسەتۋ سالالارىن دامىتۋعا سەرپىن بەرەدى»، – دەدى وبلىس اكىمى.
كەشەن Promenade Burabay اۋماعىندا، 3,1 گەكتار جەر ۋچاسكەسىندە ورنالاسادى. ەكى قاباتتى عيماراتتىڭ جالپى اۋدانى شامامەن 13 مىڭ شارشى مەتر بولادى. مۇندا مىڭ ورىندىق كورەرمەن زالى، 160 ادامعا ارنالعان كونفەرەنتس-زال جانە كۇنىنە 500 كەلۋشىنى قابىلدايتىن كورمە الاڭدارى قاراستىرىلادى.
سونىمەن قاتار ورتالىقتا بالالار مەن ەرەسەكتەرگە ارنالعان شىعارماشىلىق ستۋديالار اشىلادى. ولار ۆوكال، بي جانە مۋزىكا باعىتتارىن قامتىپ، 2,5 مىڭ تۇرعىننىڭ شىعارماشىلىقپەن اينالىسۋىنا مۇمكىندىك بەرەدى.
كەشەن قۇرامىندا قازاقستاننىڭ تاريحى مەن مادەنيەتىنە ارنالعان مۋزەي كەڭىستىگى دە بولادى. «قازاقستان پانوراماسى: وڭىرلەر مۋزەيلەرى» ەكسپوزيتسياسىندا ەلىمىزدىڭ ءار ايماعىنىڭ تاريحي-مادەني مۇراسى تانىستىرىلادى. سونداي-اق سۋرەتشىلەر مەن قولونەر شەبەرلەرىنە ارنالعان شەبەرحانالار، تسيفرلىق جانە مۋلتيمەديالىق ستۋديالار اشۋ جوسپارلانعان.
جوبانىڭ باستى مىندەتتەرىنىڭ ءبىرى – تۋريستىك اعىننىڭ ماۋسىمدىق تاۋەلدىلىگىن ازايتۋ. كونگرەسس-ورتالىقتىڭ ىسكە قوسىلۋى جىل بويى كونفەرەنتسيالار، كورمەلەر، كونتسەرتتەر مەن ءتۇرلى مادەني-ءبىلىم بەرۋ ءىس-شارالارىن وتكىزۋگە مۇمكىندىك بەرەدى. بۇل قوناقۇيلەر، مەيرامحانالار مەن باسقا دا كاسىپكەرلىك نىساندارىنىڭ دامۋىنا وڭ اسەر ەتەدى.
نىساننىڭ قۇرىلىسى 2025–2029 جىلدارعا ارنالعان ششۋچينسك-بۋراباي كۋرورتتىق ايماعىن دامىتۋدىڭ كەشەندى جوسپارىنا ەنگىزىلگەن. قۇرىلىستى 2028 جىلى اياقتاۋ جوسپارلانىپ وتىر.
