2025 جىلعا قاراي مادەنيەت سالاسىنىڭ قىزمەتكەرلەرىنىڭ جالاقىسى 100%-عا دەيىن وسەدى. بۇل تۋرالى مادەنيەت جانە سپورت ءمينيسترى داۋرەن اباەۆ جامبىل وڭىرىنە ءىس ساپارىندا ايتتى، دەپ حابارلايدى “ادىرنا” ءتىلشىسى.
مينيستر وبلىس تۇرعىندارىمەن كەزدەسۋ بارىسىندا بىرقاتار ماسەلەنى كوتەرىپ، جولدانعان ساۋالدارعا جاۋاپ بەردى. سوزىنشە سالا قىزمەتكەرلەرىنىڭ جالاقىسى 2021 جىلدان باستاپ كوتەرىلىپ كەلەدى.
“2025 جىلعا قاراي 20/20%-دان 100%-عا دەيىن جەتەدى. جالاقىلار ەكى ەسەگە كوبەيمەك. مەملەكەت ەڭبەكاقىنى كوتەرۋگە ارقاشان نەتتى. الايدا ءبىز ينفلياتسيا مەن ەكونوميكالىق جاعدايدى دا ەكەرىپ، ەسەپتەۋىمىز كەرەك. نارىقتىڭ دا كىرىس-شىعىستارى بار”،- دەدى داۋرەن اباەۆ.
ودان بولەك، جاۋاپتى ۆەدومستۆو باسشىسى ايماقتاعى ارت سپورتقا 2 ميلليارد تەڭگە بولىنگەنىن جانە كەلەر جىلدان باستاپ بۇل باعىتتى قارجىلاندىرۋ جۇمىستارىنان قيىندىقتار بولمايتىنىن جەتكىزدى.
جيىندا سپورتشىلارعا ءومىر بويىنا بەرىلەتىن تولەماقىدان باستاپ، جاس مامانداردى ۋاقىتشا باسپانامەن قامتۋ، سالاداعى تەحنيكالىق قىزمەتكەرلەردىڭ ايلىعىن ارتتىرۋ ماسەلەلەرى قوزعالدى. مينيستر ساۋالداردى قاراستىرىپ، شەشىمىن ۇكىمەتكە ۇسىنىس رەتىندە جولدايتىنىن مالىمدەدى.
