شاكەن ايمانوۆ اتىنداعى «قازاقفيلم» اكتسيونەرلىك قوعامىنىڭ پرەزيدەنتى ازامات ساتىبالدى Instagram پاراقشاسىندا وزىنە قاتىستى وتكىزىلگەن شەرۋگە قاتىستى مالىمدەمە جاسادى، دەپ حابارلايدى “ادىرنا” ۇلتتىق پورتالى.
كينوستۋديا باسشىسى بۇل ارەكەتتى اياقتان شالۋ دەپ ەسەپتەيتىن كورىنەدى.
“ەي، پەندەم. ەر جىگىتتىڭ بابىن الساڭ دا، باسىنداعى باعىن الا الماسسىڭ. سونى ۇمىتپا. جالا جابۋ. اياقتان شالۋ. جۇمىس جاساتپاۋ. كورە الماۋشىلىق. ءبىر-ەكى كۇندە ماقالام شىعادى. تولىق جاۋاپ سول جاقتا بولماق. اللاعا امانات”، – دەپ جازدى ازامات ساتىبالدى.
ايتا كەتەيىك، «قازاقفيلم» كينوستۋدياسىنىڭ قىزمەتكەرلەرى ءبىر جىلدان بەرى ەڭبەكاقىلارىن الا الماي، نارازىلىق شەرۋگە شىققان. انيماتورلاردىڭ قارا تەرگە باتىپ بىرنەشە جىل بويى ىستەگەن تۋىندىلارىنىڭ ءبىرى — «التىن ادام» اتتى تولىق مەترلى مۋلت جوباسى بىلتىر تولىق اياقتالىپتى. بىراق مەملەكەتتەن بولىنگەن ءتيىستى قاراجات ءالى كۇنگە دەيىن قىزمەتكەرلەرگە بەرىلمەگەن.
ازامات ساتىبالدىنىڭ جەلىدەگى پاراقشاسىنا جاريالاعان مالىمدەمەسىنە قازاق انيماتسيا شىعارماشىلىعىنىڭ رەداكتورى ەرلان تولەۋتاي پىكىر ءبىلدىردى.
“ەي، پەندەم", – دەپ ازالانىپتى ازامات ساتىبالدى، – الدىڭكۇنى جۋرناليستەر كەلگەندە تىعىلىپ قالعان كابينەتىنەن ەندى قۇداي بولىپ كۇڭىرەنە سويلەپ.
اكتەرلىگىندە شەك جوق ەكەن شىنىندا، الدىندا عانا انيماتورلار كەلىپ اقىرىپ تەڭدىك سۇراعاندا قايدا تىعىلارىن بىلمەي، كۇيكى پەندەنىڭ كۇيىن كەشكەن ازامات ەندى قۇداي بولىپ كۇڭىرەنىپ وتىر. و، توبا، احمەت بايتۇرسىنوۆ، مۇقاعالي ماقاتاەۆ وبرازدارىن ءولتىرىپ سومداپ تاستاعان سوڭ، ەندى قۇدايدىڭ ءرولىن ويناۋعا كوشىپتى. بۇل جونىنەن ادامزات تاريحىندا قۇداي ءرولىن سومداعان تۇڭعىش اكتەرسىڭ، ازاماتجان”، دەپ جازدى ەرلان تولەۋتاي.
جەلى قولدانۋشىسى دانيار جەتىمەكوۆ تە ازامات ساتىبالدىنىڭ ناقتى سۇراقتارعا جاۋاپ بەرۋىن قالايدى.
“ەي، پەندەم” نەسى؟! شاريعاتپەن، پايعامبار سوزىمەن جاۋاپ بەرگەنى قاي ساسقانى؟ رەسمي جاۋاپ قايدا؟ اقشا قايدا؟ ەلدىڭ جالاقىسى قايدا؟ قازاقفيلمنىڭ تۇراقتارىندا قىتاي كولىكتەرى نەستەپ تۇر؟ سوندا ءدۇيىم ەلدىكى قاتە دە، شالاقازاق ورىنباسارى ەكەۋىنىكى دۇرىس پا؟ بۇنى نە ءدىن، نە جىن يەكتەگەن”، دەپ جازدى ول.
