Şäken Aimanov atyndaǧy «Qazaqfilm» aksionerlık qoǧamynyŋ prezidentı Azamat Satybaldy Instagram paraqşasynda özıne qatysty ötkızılgen şeruge qatysty mälımdeme jasady, dep habarlaidy “Adyrna” ūlttyq portaly.
Kinostudiia basşysy būl ärekettı aiaqtan şalu dep esepteitın körınedı.
“Ei, pendem. Er jıgıttıŋ babyn alsaŋ da, basyndaǧy baǧyn ala almassyŋ. Sony ūmytpa. Jala jabu. Aiaqtan şalu. Jūmys jasatpau. Köre almauşylyq. Bır-ekı künde maqalam şyǧady. Tolyq jauap sol jaqta bolmaq. Allaǧa amanat”, – dep jazdy Azamat Satybaldy.
Aita keteiık, «Qazaqfilm» kinostudiiasynyŋ qyzmetkerlerı bır jyldan berı eŋbekaqylaryn ala almai, narazylyq şeruge şyqqan. Animatorlardyŋ qara terge batyp bırneşe jyl boiy ıstegen tuyndylarynyŋ bırı — «Altyn adam» atty tolyq metrlı mult jobasy byltyr tolyq aiaqtalypty. Bıraq memleketten bölıngen tiıstı qarajat älı künge deiın qyzmetkerlerge berılmegen.Azamat Satybaldynyŋ jelıdegı paraqşasyna jariialaǧan mälımdemesıne Qazaq animasiia şyǧarmaşylyǧynyŋ redaktory Erlan Töleutai pıkır bıldırdı.
“Ei, pendem", – dep azalanypty Azamat Satybaldy, – aldyŋkünı jurnalister kelgende tyǧylyp qalǧan kabinetınen endı Qūdai bolyp küŋırene söilep.
Akterlıgınde şek joq eken şynynda, aldynda ǧana animatorlar kelıp aqyryp teŋdık sūraǧanda qaida tyǧylaryn bılmei, küikı pendenıŋ küiın keşken Azamat endı Qūdai bolyp küŋırenıp otyr. O, toba, Ahmet Baitūrsynov, Mūqaǧali Maqataev obrazdaryn öltırıp somdap tastaǧan soŋ, endı Qūdaidyŋ rölın oinauǧa köşıptı. Būl jönınen adamzat tarihynda Qūdai rölın somdaǧan tūŋǧyş aktersıŋ, Azamatjan”, dep jazdy Erlan Töleutai.
Jelı qoldanuşysy Daniiar Jetımekov te Azamat Satybaldynyŋ naqty sūraqtarǧa jauap beruın qalaidy.
“Ei, pendem” nesı?! Şariǧatpen, paiǧambar sözımen jauap bergenı qai sasqany? Resmi jauap qaida? Aqşa qaida? Eldıŋ jalaqysy qaida? Qazaqfilmnıŋ tūraqtarynda Qytai kölıkterı nestep tūr? Sonda düiım eldıkı qate de, şalaqazaq orynbasary ekeuınıkı dūrys pa? Būny ne dın, ne jyn iektegen”, dep jazdy ol.
