ەلىمىزدە نەگىزگى ۇبت تاپسىرۋ مەرزىمى اياقتالدى، دەپ حابارلايدى "ادىرنا" ۇلتتىق پورتالى.
ۇلتتىق تەستىلەۋ ورتالىعى 12 شىلدە كۇنى تەستتىڭ اياقتالعانىن حابارلادى. ۇلتتىق تەستىلەۋ ورتالىعى قورىتىندىسى بويىنشا رەسپۋبليكا بويىنشا 181 مىڭنان استام تالاپكەر ۇبت تاپسىرعان.
"تالاپكەرلەردىڭ 75,1 پايىزى قازاق تىلىندە، 24,8 پايىزى ورىس تىلىندە، 168 ادام اعىلشىن تىلىندە تەستىلەۋدەن ءوتتى. شەكتى بالدى 76,4 پايىزعا جۋىق (139 مىڭ) تالاپكەر جينادى; ورتاشا بالل – 68 بالل. 641 ەرەكشە ءبىلىم بەرۋ قاجەتتىلىگى بار بالا قاتىستى", - دەلىنگەن حابارلامادا.
الايدا ۇتو ەرەجەسىن بۇزعان 628 تالاپكەردىڭ ناتيجەسى جويىلعان.
"سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان 393 تالاپكەر تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 188 ادام شىعارىلدى; بەينەجازبالاردى تەكسەرۋدەن سوڭ ەرەجە بۇزعان 47 ادامنىڭ ناتيجەسى جويىلدى; بوگدە تۇلعالار انىقتالعان جوق", - دەيدى ورتالىق ماماندارى.
