پەنسيلۆانيا شتاتىندا سايلاۋالدى ناۋقاندا ءسوز سويلەگەن دونالد ترامپقا قاستاندىق جاسالدى، دەپ حابارلايدى "ادىرنا" ۇلتتىق پورتالى.
14 شىلدە كۇنى اقش-تىڭ بۇرىنعى پرەزيدەنتى دونالد ترامپقا وق اتىلدى. ساياساتكەر ءسوز سويلەگەن مىنبەنىڭ ارتىنا تىعىلىپ، ارتىنشا ەكس-پرەزيدەنتتى وققاعارلارى الىپ كەتتى.
قاستاندىق سالدارىنان ترامپتىڭ وڭ قۇلاعىنا وق ءتيىپ، جاراقات العان. قازىر دونالد ترامپتىڭ ءباسپاسوز حاتشىسى ستيۆەن چۋنگ ونىڭ ەمدەلىپ جاتقانىن حابارلادى.
شەتەلدىك باق مالىمەتىنشە، ەكس-پرەزيدەنتكە سايلاۋ الدىندا قاستاندىق جاساعان ادام ۇستالعان. ونى اقش-تىڭ قۇپيا قىزمەتى ولتىرگەن.
الايدا سايلاۋ جيىندا بولعان اتىستان ءبىر كورەرمەن قازا تاۋىپ، ەكەۋى اۋىر جارالانعان. ولار قازىر اۋرۋحانادا.
2024 جىلعى اقش پرەزيدەنتىنىڭ سايلاۋىنا ەكس-باسشى كانديدات رەتىندە تىركەلگەن. ول اتىستان كەيىن:
"مەن امەريكا قۇراما شتاتتارىنىڭ قۇپيالىق قىزمەتىنە جانە بارلىق قۇقىق قورعاۋ ورگاندارىنا پەنسيلۆانيا شتاتىنىڭ باتلەر قالاسىندا بولعان اتىس وقيعاسىندا جەدەل ارەكەت ەتكەنى ءۇشىن العىس بىلدىرەمىن. قازا بولعان ادامنىڭ وتباسىنا جانە جاراقات العان ادامنىڭ جاقىندارىنا كوڭىل ايتامىن. قاستاندىق ۇيىمداستىرعان ادام تۋرالى ازىرگە حابار جوق. وق وڭ قۇلاعىمنىڭ ءۇستىن تەسىپ ءوتتى. قۇداي امەريكانى جارىلقاسىن!”، – دەدى ترامپ.
اقش-تىڭ قازىرگى پرەزيدەنتى دجو بايدەن ترامپقا قاستاندىق جاسالدى دەگەن اقپاراتقا ءوزىنىڭ ح پاراقشاسىندا جاۋاپ بەردى.
"ونىڭ جاعدايى جاقسى ەكەنىنە قۋانىشتىمىن. وعان جانە ونىڭ وتباسىنا جانە ناۋقانعا قاتىسقانداردىڭ بارلىعى ءۇشىن دۇعا ەتەمىن. ونى امان الىپ قالعان قۇپيالىق قىزمەتكە العىس ايتامىز. امەريكادا مۇنداي زورلىق-زومبىلىققا ورىن جوق، بۇكىل حالىق بىرىگۋى كەرەك", – دەپ جازدى ول.
