Pensılvanııa shtatynda saılaýaldy naýqanda sóz sóılegen Donald Trampqa qastandyq jasaldy, dep habarlaıdy "Adyrna" ulttyq portaly.
14 shilde kúni AQSh-tyń burynǵy prezıdenti Donald Trampqa oq atyldy. Saıasatker sóz sóılegen minbeniń artyna tyǵylyp, artynsha eks-prezıdentti oqqaǵarlary alyp ketti.
Qastandyq saldarynan Tramptyń oń qulaǵyna oq tıip, jaraqat alǵan. Qazir Donald Tramptyń baspasóz hatshysy Stıven Chýng onyń emdelip jatqanyn habarlady.
Sheteldik BAQ málimetinshe, eks-prezıdentke saılaý aldynda qastandyq jasaǵan adam ustalǵan. Ony AQSh-tyń qupııa qyzmeti óltirgen.
Alaıda saılaý jıynda bolǵan atystan bir kórermen qaza taýyp, ekeýi aýyr jaralanǵan. Olar qazir aýrýhanada.
2024 jylǵy AQSh prezıdentiniń saılaýyna eks-basshy kandıdat retinde tirkelgen. Ol atystan keıin:
"Men Amerıka Qurama Shtattarynyń Qupııalyq qyzmetine jáne barlyq quqyq qorǵaý organdaryna Pensılvanııa shtatynyń Batler qalasynda bolǵan atys oqıǵasynda jedel áreket etkeni úshin alǵys bildiremin. Qaza bolǵan adamnyń otbasyna jáne jaraqat alǵan adamnyń jaqyndaryna kóńil aıtamyn. Qastandyq uıymdastyrǵan adam týraly ázirge habar joq. Oq oń qulaǵymnyń ústin tesip ótti. Qudaı Amerıkany jarylqasyn!”, – dedi Tramp.
AQSh-tyń qazirgi prezıdenti Djo Baıden Trampqa qastandyq jasaldy degen aqparatqa óziniń H paraqshasynda jaýap berdi.
"Onyń jaǵdaıy jaqsy ekenine qýanyshtymyn. Oǵan jáne onyń otbasyna jáne naýqanǵa qatysqandardyń barlyǵy úshin duǵa etemin. Ony aman alyp qalǵan Qupııalyq qyzmetke alǵys aıtamyz. Amerıkada mundaı zorlyq-zombylyqqa oryn joq, búkil halyq birigýi kerek", – dep jazdy ol.
