8 شىلدە كۇنى مەملەكەت باسشىسى قاسىم-جومارت توقاەۆ ويىن بيزنەسى، لوتەرەيا قىزمەتى جانە لۋدومانياعا قاتىستى زاڭ جوباسىنا قول قويدى. اتالعان زاڭ قوعامعا ۇلكەن وزگەرىس اكەلمەك. بۇل تۋرالى بەلگىلى زاڭگەر تىلەۋجان كىشكەنەباەۆ ايتىپ بەردى.
- جاقىندا پرەزيدەنت قول قويعان لۋدومانياعا قاتىستى زاڭ - قوعامعا ۇلكەن وزگەرىس اكەلمەك. ويتكەنى، زاڭ جۇزىندە تىيىم سالىنىپ، ويىن بيزنەسى تىيىلادى. ويىن بيزنەسى تىيىلسا، ويىنشىلار دا، ومىردە ءوز ورنىن تاپپاي جۇرگەن جاستارىمىز بۇل جولعا تۇسپەيدى. زاڭ بويىنشا، قالا ىشىندەگى ويىن-ساۋىقتار، اۆتوماتتار قوعامدىق ورىنداردان الىستاتىپ جاتىر.بۇعان دەيىن تالاي ۇتىس ويىندارىنا قاتىسىپ، ابدەن قارىزدانعان تۇلعالار ەندى بۋكمەكەرلىك كەڭسەلەر مەن كازينولارعا كىرە المايدى. بۇگىندە قارا تىزىمگە ەنگەن 3,5 ملن قازاقستاندىق بار. مەملەكەتتىك قىزمەتشىلەر مەن اسكەري قىزمەتكەرلەر، بيۋدجەتتىك ۇيىم باسشىلارىنا دا ءباس تىگۋگە تىيىم سالىندى. شەكتەۋگە 280 مىڭ ادام ىلىككەن. تالاپتى بۇزسا، ەشقانداي ەسكەرتۋسىز جۇمىستان شىعارالادى. زاڭ جوباسىنا بۇل نورمانىڭ ەنۋى تەگىن ەمەس. سەبەبى، بۇعان دەيىن مەملەكەتتىك قىزمەتكەرلەردىڭ 507 ملن تەڭگەسىن قۇمار ويىنعا جۇمساعانى بەلگىلى بولعان. باس-اياعى 305 ادام. ونلاين-كازينو ۇيىمداستىرۋشىلار دا قىلمىستىق جاۋاپقا تارتىلادى. ولار 7 جارىم ملن تەڭگە ايىپپۇل تولەپ، نەمەسە 2 جىلعا دەيىن باس بوستاندىعىنان ايىرىلۋى مۇمكىن. بۇدان بولەك، بۋكمەكەرلىك كەڭسەلەر مەن ونلاين-كازينولاردى بۇقارالىق اقپارات قۇرالدارى، كينو، ۆيدەو ارقىلى جارنامالاۋعا ءىشىنارا تىيىم سالىنادى. ال قۇمار ويىنىن ناسيحاتتاعان بلوگەرلەر مەن قوعام بەلسەندىرى كەمءى 200 مىڭ تەڭگە ايىپپۇل تولەيدى, - دەدى زاڭگەر.
پراكتيك-پسيحولوگ، گەشتالت-تەراپەۆت ۇلمەكەن ساندىبەكقىزىنىڭ ايتۋىنشا، لۋدومانياعا شالدىققان ادام ءۇشىن زاڭمەن تىيىمنان بولەك، ونىمەن تولىققاندى جۇمىس ىستەۋ قاجەت.
- لۋدومانيا – دەرت. ونى تىيۋ ءۇشىن تولىققاندى جۇمىس جۇرگىزىلۋ كەرەك. زاڭ تولىعىمەن جويادى دەپ ايتۋ قيىن. بىراق الدىن الۋعا وراسان كومەگى بولماق. سەبەبى، ءاربىر ادام ءوز ارەكەتىنىڭ الىپ كەلەر سالدارىن ەسكەرەر بولسا، قورقىنىش سەزىمىن ۇيالاتۋ ارقىلى وزىن بۇل دەرتتەن شەكتەۋىنە ىقپال ەتە الادى. لۋدومانيا- “ەسسىزدىككە جەتكەنشە ويناۋ” - دەگەن ماعىنانى بەرەدى. ازارتتىق –تاۋەلدىلىكتىڭ بۇزىلىسى. ازارتتىق تاۋەلدىلىك ساتىندە ادام ءوز سەزىمدەرىن جانە ءوزىن باقىلاي الماۋ سەبەبىنەن قارجىلىق جانە الەۋمەتتىك قيىندىقتارعا تاپ بولادى. لۋدوماندار ادەتتە ءوزىنىڭ ىشكى قاجەتتىلىكتەرىن ويىن ارقىلى جابۋدى كوزدەيدى. ويىن بارىسىندا ءبىر ساتتىك ەيفوريانى باستان وتكىزەدى. اقشانى ۇتىلىپ قالعاندا دەپرەسسيا، مازاسىزدىق، قاۋقارسىزدىق، كىنا سەزىمىن كەشەدى. سول كىنا سەزىمىن جەڭىلدەتۋ ماقساتىندا ۇتىلعان اقشانى قايتارامىن دەگەن الدامشى ويمەن قايتا-قايتا ويناپ، شىرماۋىقتان شىعا الماي جاتادى. باستاپقىدا تەز بايىپ كەتۋدى كوزدەسە، ءارى قاراي سول سەرپىلىس، ەموتسيانى قايتا باستان وتكىزۋ ءۇشىن وينايدى, - دەيدى پسيحولوگ مامان.
سونداي-اق، پسيحولوگ لۋدومانيا دەرتىنە شالدىققان ادامنان بولەك، ونىڭ تولىق وتباسىنا دا توپتىق تەراپيا جاسالۋ قاجەت ەكەنىن ايتادى.
- لۋدومانيانى ەمدەۋ ۇزاق ۋاقىتتى جانە ادامنىڭ سانالى تۇردە دايىندىعىن تالاپ ەتەدى. لۋدومانيا تاۋەلدىلىكتىڭ ءتۇرى بولعاندىقتان، تەك لۋدوماندى عانا ەمەس، ونىڭ تولىق وتباسىنا جەكە جانە توپتىق تەراپيا جۇرگىزىلگەن دۇرىس. ويتكەنى بۇل دەرت – وتباسىلىق دەرت. لۋدومانعا العاش قول سوزىپ، كومەك بەرىپ، اياۋشىلىق تانىتاتىن دا جاقىندارى. سونىمەن قاتار، سالاۋاتتى ءومىر سالتىن ۇستانۋ، تۇرعىلىقتى ورنىن اۋىستىرۋ، قىزىعۋشىلىقتارىن كوبەيتۋ، رۋحاني بايلىقتى، كىتاپ تەراپياسى، ادامي قۇندىلىقتى دامىتۋدى باستى نازارعا العان ءجون. قازىرگى تاڭدا لۋدومانيانى ەمدەۋدە، لۋدومانداردى قولداۋ ماقساتىندا كوپ كومەك بەرەتىن وڭالتۋ ورتالىقتارى جانە قۇمار ويىنشىلاردىڭ ءانونيمدى كلۋبتارى بار. ۇنەمى ءوزىن باقىلاۋدا ۇستاپ، ءوز ەنەرگياسىن پايدالى ارناعا باعىتتاۋعا داعدىلانسا دەرتتەن ايىعادى. قازىرگى تاڭدا لۋدومانيانى جەڭىپ، باسقا جاندارعا جول كورسەتىپ جۇرگەن تۇلعالار دا بارشىلىق. ەڭ باستىسى ۋاقىتىندا دابىل قاعىپ، ۋاقىتىلى كومەك قولىن سوزۋ قاجەت، - دەيدى ۇلمەكەن ساندىكبەكقىزى.
