"حابار" ارناسىنداعى اتىشۋلى "بىراق" توك-شوۋى زورلىق-زومبىلىق كورسەتكەن كۇيەۋىمەن تاتۋلاستىرماق بولعان ايەلدىڭ رەسمي تۇردە اجىراسقانى ايتىلدى، دەپ حابارلايدى "ادىرنا" ۇلتتىق پورتالى.
مالىمەتتى «قورعاۋ استانا» قورىنىڭ جەتەكشىسى اننا رىل ءوزىنىڭ Facebook پاراقشاسىندا جازدى. گۇلميرا (جابىرلەنۋشىنىڭ اتى-ءجونى) ۇيىندەگى "تيراننان" سول قوردىڭ قولداۋىمەن جاسىرىنىپ جۇرگەن بولاتىن.
سونىمەن قاتار، اننا رىل وتباسى رەسمي تۇردە اجىراسقانىمەن ناۋرىز ايىندا بەرىلگەن تالاپ-ارىزعا سايكەس بىردە-ءبىر اليمەنت تولەنبەگەنىن جازدى.
«گۇلميرانى اجىراسۋ ءراسىمىنىڭ اياقتالۋىمەن قۇتتىقتايمىز. سونىمەن قاتار ناۋرىز ايىندا ءبىز اليمەنت ءوندىرۋ تۋرالى تالاپ ارىز جازعان بولاتىنبىز، سوت شەشىمى بويىنشا سوما ءار بالاعا نەبارى 10 مىڭ تەڭگەنى قۇراعان، اليمەنت ءوندىرۋ تۋرالى شەشىمنىڭ زاڭدى كۇشىنە ەنگەنىنە كوپ ۋاقىت بولدى، بىراق وسى ۋاقىتقا دەيىن ەشقانداي اليمەنت تولەنبەدى. دەسە دە، تاعى ءبىر قادام ەڭسەرىلدى!» – دەپ جازادى ول.
اننا رىل جازبا سوڭىندا قازاق ايەلدەرىنە قولداۋ ءبىلدىردى.
«ۋايىمداماڭىزدار، ومىرىڭىزدە قانداي جاعداي بولسا دا، ءسىزدى قولدايتىندار ارقاشان تابىلادى!» – دەپ سەندىردى ورتالىق باسشىسى.
ەستەرىڭىزگە سالا كەتەيىك، باعدارلامانىڭ شۋلى ءبولىمى ناۋرىز ايىندا ەفيرگە شىققان بولاتىن. العاشىندا 20 جىل بويى كۇيەۋىنەن زورلىق-زومبىلىق كورگەن گۇلميراعا كۇيەۋىنىڭ ءتۇسىرىلىم الاڭىنا شىقپايتىنى ۋادە ەتىلگەن. بىراق كەيىپكەر ءۇشىن كۇتپەگەن جەردەن ول قولىندا ءبىر شوق گۇلىمەن شىعىپ، كەشىرىم سۇرادى. ودان كەيىن تاتۋلاسۋدى تالاپ ەتكەن جۇرگىزۋشىلەردىڭ ايەلگە جاساعان ارەكەتى كورەرمەندەردىڭ نارازىلىعىن تۋدىردى. ەفيردەن كەيىن كۇيزەلىسكە ۇشىراعان جابىرلەنۋشى قايتادان پسيحولوگتارعا جۇگىنۋگە ءماجبۇر بولىپ، جۇرتشىلىق قىسىمىمەن جانە مينيستر ايدا بالاەۆانىڭ مالىمدەمەسىمەن توك-شوۋ جابىلدى.
