قازاقستاننىڭ ءباا-دەگى ەلشىلىگىنىڭ كەڭەسشىسى ساكەن ماماشتىڭ ايەلى كۇيەۋىنىڭ كوپ جىلعى ازاپتاۋ ارەكەتتەرى جايلى ايتتى، - دەپ حابارلايدى “ادىرنا” ۇلتتىق پورتالى. بۇل تۋرالى ول كتك ارناسىنا بەرگەن سۇحباتىندا مالىمدەدى.
كارينا ماماش 6 مامىردا الەۋمەتتىك جەلىدە كۇيەۋىنىڭ 10 جىل بويى سوققىعا جىققانىن حابارلاعان بولاتىن. قازىر جاس كەلىنشەك بالالارىمەن، اپكەسى مەن اناسىمەن استاناداعى داعدارىس ورتالىعىندا جاتىر.
"قازىر مەن ءوزىمدى قاۋىپسىز سەزىنەمىن. بالالار جانىمدا، انام، اپكەم دە. مەن ۇزاق جىلدار بويى قورقىنىشپەن ءومىر سۇرگەندىكتەن قازىر وزىمە كەلدىم. مەن ەشقايدا بارمادىم. ال ونىڭ كەيبىر تۋىستارى، دالىرەك ايتساق جيەنى ءبىلدى. سەبەبى ول مەنى كەزەكتى ۇرىپ-سوعۋدان كەيىن اۋرۋحاناعا مۇرنىمدى تىگۋ ءۇشىن اپارعان بولاتىن. مەن كەتەمىن دەپ ايتقان جوقپىن، مەن جەلىگە بارلىق ايىپتى دالەلدەيتىنىمدى ايتتىم. مەنى ۇرۋىڭدى توقتاتپاساڭ، تۇرمەگە جابىلاسىڭ دەدىم. ال ول ماعان «ماعان ءبارىبىر» دەپ كۇلدى”، - دەدى كارينا ماماش.
ديپلوماتتىڭ ايەلىنىڭ ايتۋىنشا، ءبىر كۇن بۇرىن كۇيەۋى ءوزىن عانا ەمەس، ولارعا قوناققا كەلگەن اپكەسىن دە ۇرعان. اپكەسىنىڭ باسى قاتتى سوققىدان كەيىن كوگەرىپ، كورۋ قابىلەتى ناشارلاعان.
كارينا وتباسىنداعى زورلىق-زومبىلىق تۋرالى تەك جاقىن دوستارى عانا بىلەتىنىن جانە ول كوپ جاعدايدى وتباسىنان جاسىراتىنىن ايتادى. بۇل رەتتە ول ءبارى ۇيلەنگەن العاشقى كۇننەن باستالعانىن ايتادى. كوبىنە كۇيەۋى اگرەسسيۆتى بولىپ، ماس بولعان كەزدە قولىن كوتەرەتىن بولعان.
قازاقستاننىڭ سىرتقى ىستەر مينيسترلىگى ساكەن ماماشتى شەتەلدەن شۇعىل تۇردە شاقىرتىپ الدى. استانا پوليتسياسى قىلمىستىق ءىس قوزعادى.
«بۇل كوبىنە ايتىلا بەرمەيتىن ماسەلەنىڭ شەتىن اشادى. شەتەلدە تۇراتىن ديپلوماتتاردىڭ ايەلدەرى كوپ جاعدايدا قارجىلاي كۇيەۋىنە تاۋەلدى بولادى. ويتكەنى ديپلوماتتارعا شەتەلگە ىسساپارعا، ايەلدەرى مەن بالالارىن ورنالاستىرۋ ءۇشىن تولەنەتىن «قوسىمشا» قاراجات دەگەن بار. ايەلدەردىڭ جەكە قاراجاتى كوپ بولمايدى، سوندىقتان ولار وزدەرىنىڭ جۇبايلارىنا بەلگىلى ءبىر دارەجەدە تاۋەلدى بولادى. سوندىقتان مۇنداي زورلىق-زومبىلىق ارەكەتتەرى كوبىنە ايتىلماي قالادى»، - دەدى «قورعاۋ استانا» قورىنىڭ باسشىسى.
