قازاقستاندا تۇرمىستىق زورلىق-زومبىلىق باعىتىنداعى زاڭنامانى رەفورمالاۋ تۋرالى پەتيتسياعا قويىلعان قولدار سانى 50 مىڭنان استى، دەپ حابارلايدى "ادىرنا" ۇلتتىق پورتالى. ەندى تالاپتى ۇكىمەت قاراستىرۋى كەرەك.
15 قاراشادا تۇنگى ساعات ەكىگە قاراي تۇرمىستىق زورلىق-زومبىلىققا قارسى پەتيتسياعا قويىلعان قولدار سانى 50 مىڭنان اسىپ كەتكەن. ءدال قازىر بۇل كورسەتكىش 87 مىڭعا جەتكەن.
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە قوعامدىق باقىلاۋ جانە اكىمشىلىك راسىمدەردى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا سايكەس 50 مىڭنان استام داۋىس جيناعان وتىنىشتەر ۇكىمەت دەڭگەيىندە قارالۋى ءتيىس.
پەتيتسيانى جاريالاعان «تالاپ» قولدانبالى زەرتتەۋلەر ورتالىعىنىڭ ديرەكتورى راحىم وشاقباەۆ اتالعان ۇسىنىستى، ءتيىستى زاڭ قابىلدانعاننان كەيىن جوعارى دەڭگەيدە قاراۋ ءۇشىن قاجەتتى قولدار جينالعان العاشقى ۇندەۋ ەكەنىن اتاپ ءوتتى.
«ءالى دە كوبىرەك قول جينالادى دەگەن سەزىم بار. قازاقستاندىقتار ىنتىماقتى بىلدىرگىسى كەلەدى، سوندىقتان ولار پەتيتسياعا بەلسەندى تۇردە قول قويۋدا»، -دەيدى ول.
راحىم وشاقباەۆ بىرىڭعاي پورتالدىڭ جوقتىعى قازاقستاندىقتاردىڭ بۇل ماسەلەگە قاتىستى پىكىرىن بىلدىرۋىنە كەدەرگى بولماۋى كەرەك دەپ سانايدى:
«پەتيتسيا ورنالاستىرىلعان سايت – ءبىزدىڭ مەملەكەتتىك قىزمەت. باسقا پلاتفورمالاردان ايىرماشىلىعى، ول بەلگىلەۋلەردەن ايىرىلعان. ونىڭ ەرەكشەلىگى سول، ءبىز ءاربىر قولتاڭبانى SMS ارقىلى تەكسەرەمىز، ياعني ءاربىر داۋىس جەكە تەلەفون نومىرمەن تىركەلىپ، ونىڭ ارتىندا ناقتى ادام تۇرادى. ۆەب-سايت پەتيتسياعا قول قويعاندار تۋرالى اقپاراتتى كورسەتەدى" دەپ قوسىت ول.
قىزمەت كورسەتۋ توبى قاجەت بولعان جاعدايدا قوسىمشا تەكسەرۋ ءۇشىن قول قويۋشىلاردىڭ ءتىزىمىن بەرۋگە دايىن ەكەنىن اتاپ ءوتتى.
