"Habar" arnasyndaǵy atyshýly "Biraq" tok-shoýy zorlyq-zombylyq kórsetken kúıeýimen tatýlastyrmaq bolǵan áıeldiń resmı túrde ajyrasqany aıtyldy, dep habarlaıdy "Adyrna" ulttyq portaly.
Málimetti «Qorǵaý Astana» qorynyń jetekshisi Anna Ryl óziniń Facebook paraqshasynda jazdy. Gúlmıra (jábirlenýshiniń aty-jóni) úıindegi "tırannan" sol qordyń qoldaýymen jasyrynyp júrgen bolatyn.
Sonymen qatar, Anna Ryl otbasy resmı túrde ajyrasqanymen naýryz aıynda berilgen talap-aryzǵa sáıkes birde-bir alıment tólenbegenin jazdy.
«Gúlmırany ajyrasý rásiminiń aıaqtalýymen quttyqtaımyz. Sonymen qatar naýryz aıynda biz alıment óndirý týraly talap aryz jazǵan bolatynbyz, sot sheshimi boıynsha soma ár balaǵa nebári 10 myń teńgeni quraǵan, alıment óndirý týraly sheshimniń zańdy kúshine engenine kóp ýaqyt boldy, biraq osy ýaqytqa deıin eshqandaı alıment tólenbedi. Dese de, taǵy bir qadam eńserildi!» – dep jazady ol.
Anna Ryl jazba sońynda qazaq áıelderine qoldaý bildirdi.
«Ýaıymdamańyzdar, ómirińizde qandaı jaǵdaı bolsa da, sizdi qoldaıtyndar árqashan tabylady!» – dep sendirdi ortalyq basshysy.
Esterińizge sala keteıik, baǵdarlamanyń shýly bólimi naýryz aıynda efırge shyqqan bolatyn. Alǵashynda 20 jyl boıy kúıeýinen zorlyq-zombylyq kórgen Gúlmıraǵa kúıeýiniń túsirilim alańyna shyqpaıtyny ýáde etilgen. Biraq keıipker úshin kútpegen jerden ol qolynda bir shoq gúlimen shyǵyp, keshirim surady. Odan keıin tatýlasýdy talap etken júrgizýshilerdiń áıelge jasaǵan áreketi kórermenderdiń narazylyǵyn týdyrdy. Efırden keıin kúızeliske ushyraǵan jábirlenýshi qaıtadan psıhologtarǵa júginýge májbúr bolyp, jurtshylyq qysymymen jáne mınıstr Aıda Balaevanyń málimdemesimen tok-shoý jabyldy.
