ۇكىمەت قاۋلىسىمەن 23 ءساۋىر ۇلتتىق كىتاپ كۇنى بولىپ بەكىتىلدى. وسىعان وراي مادەنيەت جانە اقپارات مينيسترلىگى ۇزدىك كىتاپتارعا ارنالعان «ۇلتتىق كىتاپ» بايقاۋىن جاريالادى. بۇل تۋرالى مادەنيەت جانە اقپارات ءمينيسترى ايدا بالاەۆا Facebook پاراقشاسىندا جازدى، دەپ حابارلايدى “ادىرنا” ۇلتتىق پورتالى.
«قۇرمەتتى دوستار! مەملەكەت باسشىسى ۇلتتىق قۇرىلتايدىڭ ءۇشىنشى وتىرىسىندا ۇلتتىق كىتاپ كۇنىن بەلگىلەۋ تۋرالى تاپسىرما بەرگەنى بەلگىلى. قازاقستان رەسپۋبليكاسىنداعى مەرەكە كۇندەرىنىڭ تىزبەسىنە جاڭا مەرەكە قوسىلدى. ۇكىمەت قاۋلىسىمەن 23 ءساۋىر ۇلتتىق كىتاپ كۇنى بولىپ بەلگىلەندى!
پرەزيدەنت ءوز سوزىندە: «شىن مانىندە، وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك»، - دەپ اتاپ ءوتتى. قوعامدا كىتاپ وقۋ مادەنيەت قالىپتاستىرۋ بويىنشا مينيسترلىك تاراپىنان جۇيەلى جۇمىستار جالعاسا بەرەدى.
وسى ورايدا، مادەنيەت جانە اقپارات مينيسترلىگى ۇلتتىق كىتاپ كۇنىنە وراي ۇزدىك كىتاپتارعا ارنالعان «ۇلتتىق كىتاپ» بايقاۋىن جاريالادى»، دەپ جازدى ايدا بالاەۆا Facebook پاراقشاسىندا.
ءمينيستردىڭ ايتۋىنشا، بايقاۋدا «بالالارعا ارنالعان ۇزدىك كىتاپ»، «جاسوسپىرىمدەرگە ارنالعان ۇزدىك كوميكس كىتابى»، «نون فيكشن (پسيحولوگيالىق، موتيۆاتسيالىق، بيزنەس) باعىتىنداعى ۇزدىك كىتاپ»، «دەتەكتيۆ جانرىنداعى ۇزدىك كىتاپ»، «ساتيرا جانرىنداعى ۇزدىك كىتاپ»، «ۇزدىك يليۋستراتسيالىق كىتاپ»، «ۇزدىك اۋدارما كىتابى»، «ەڭ كوپ وقىلعان كىتاپ»، «فەنتەزي جانرىنداعى ۇزدىك كىتابى»، «ۇزدىك باسپا» نوميناتسيالارى بويىنشا جەڭىمپازدار انىقتالادى. سونداي-اق «جىل كىتابىنا» گران-پري سىيلىعى تابىستالادى.
«بۇل بايقاۋ ۇزدىك كىتاپتاردى انىقتاپ، ونى كوپشىلىككە ناسيحاتتاۋعا، قوعامدى كىتاپ وقۋعا ۇندەۋگە ىقپال ەتەدى دەگەن ويدامىز»، دەلىنگەن جازبادا.
