مادەنيەت جانە اقپارات ءمينيسترى قۋاندىق بيشىمباەۆقا قاتىستى سوت وتىرىسىنا كىرگىزىلمەگەن جۋرناليستەردى قولدادى، دەپ حابارلايدى "ادىرنا" ۇلتتىق پورتالى.
ايدا بالاەۆا باسقارمانىڭ جۋرناليستەر قۇقىعىن شەكتەۋگە قارسى ەكەنىن، باسپاسوزدە وقيعالاردى وبەكتيۆتى تۇردە جاريالايتىن اقپاراتقا ەركىن قول جەتكىزۋدى قولدايتىنىن باسا ايتتى.
«بۇل رەتتە كەشەگى سوت وتىرىسىندا ارنايى ورىننىڭ بولماۋىنا بايلانىستى باق وكىلدەرى سوت وتىرىسىن بەلگىلەنگەن بولەك بولمەدە وتىرىپ كوردى. الايدا باق وكىلدەرىنە ءتيىستى ورىندار بولۋى كەرەك. وسى جاعدايدى ەسكەرە وتىرىپ، مينيسترلىك مۇددەلى مەملەكەتتىك ورگاندارمەن بىرلەسىپ، جۋرناليستەردى قاجەت ورىندارمەن قامتۋ جۇمىسىن جۇرگىزەتىن بولادى»، - دەپ جازدى مينيستر Facebook پاراقشاسىندا.
بالاەۆا سونداي-اق "باق وكىلدەرىن سوت پروتسەسىن جاريالاۋ كەزىندە بىرقاتار ەتيكالىق اسپەكتىلەردى، اتاپ ايتساق، زاڭ ۇستەمدىگىن، بەيتاراپ ادىلەتتىلىكتى ەسكەرىپ، جالعان اقپاراتتىڭ تارالۋىنان جانە كەز كەلگەن فورمادا سوت قىزمەتىنە ارالاسۋدان ساق بولۋعا" شاقىردى.
ەسكە سالا كەتەيىك، ەلوردالىق جۋرناليستەر استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا پوليتسياعا ارىز جازعان بولاتىن. باق وكىلدەرى سوت اكىمشىلىگىنىڭ بيشىمباەۆتىڭ ءىسى بويىنشا تىڭداۋ ءوتىپ جاتقان سوت زالىنا كىرگىزبەي قويعانىنا نارازى بولدى.
