الماتى قالاسى، قاراساي اۋدانى، جاڭاتۇرمىس اۋىلىنىڭ تۇرعىندارى جەر ماسەلەسىنە قاتىستتى ارىزىن ايتتى، دەپ حابارلايدى “ادىرنا” ءتىلشىسى.
رەداكتسيامىزعا جەتكەن مالىمەتتەرگە سۇيەنسەك، تۇرعىندار بىرنەشە جىل بۇرىن زاڭدى تۇردە مەملەكەتتەن العان، قۇجاتى تولىق جەرلەرىن پايدالانا الماي وتىر. الماتى قالاسىنىڭ جەر رەسۋرستارىن باسقارۋ كوميتەتى 300 تۇرعىننىڭ جەردى ساتىپ الۋ قۇجاتتارىن زاڭسىز دەپ تانىپ، شاعىم تۇسىرگەن. تۇرعىندار ءبىزدىڭ كونستيتۋتسيالىق قۇقىعىمىز تاپتالدى دەپ اشىنىپ وتىر:
“اتالمىش جەر بۇرىن شارۋا قوجالىعى بولعان. ۇكىمەتتەن جەكە ادامدار ارقىلى ساتىلىم زاڭدى تۇردە جاسالادى. سولايشا 268 گا جەر 4 ماسسيۆكە ءبولىنىپ، ءبىز زاڭدى تۇردە ساتىپ الدىق. قولىمىزدا بارلىق مەملەكەتتىك اكت، ساتىپ الۋ قۇجاتتارى تۇگەل. ەندى كەلىپ جەر رەسۋرستارىن باسقارۋ كوميتەتى سول قۇجاتتارىمىزدى جوققا شىعارىپ، جەردى تارتىپ الماقشى. ءبىزدىڭ قولىمىزدا مەملەكەتتىك ءمور باسىلعان قۇجاتتار تۇر. كوميتەت كەلىپ جاي عانا جەردى مەملەكەتكە قايتارىپ بەرمەك. تولەم جاساۋ تۋرالى ەشقانداي اڭگىمە ايتىلمادى. سوندا الماتى قالاسىنىڭ جەر رەسۋرستارىن باسقارۋ كوميتەتى مەملەكەتتىك قۇجاتتى سىيلاماعانى ما؟” دەدى جاڭاتۇرمىس تۇرعىنى ايدانا بولات.
تۇرعىنداردىڭ ايتۋىنشا، الماتى قالاسى جەر رەسۋرستارىنىڭ كوميتەتى 300 مەملەكەتتىك اكت يەسىنىڭ كەلىسىم-شارتتارىن، ءۇي سالۋعا رۇقسات قاعازدارىن دا جارامسىز ەتكەن.
باس كوتەرگەن جەر يەلەرى مەملەكەت باسشىسى قاسىم-جومارت توقاەۆتان، قر كونستيتۋتسياسىنان اراشا سۇراۋدا.
جەر داۋىنا قاتىستى سوت جاڭاتۇرمىس اۋىلىندا، جۇما كۇنى وتەتىنى ايتىلدى.
