قاراساي اۋداندىق سوتى 15 شىلدە كۇنى الماتى وبلىسىنىڭ تاۋلارىندا موتوتسيكل جۇرگىزۋشىلەرىن قامشىمەن ساباپ، مىلتىق كەزەگەن ءبىر توپ ازاماتقا قاتىستى شەشىم شىعاردى، دەپ حابارلايدى “ادىرنا” ۇلتتىق پورتالى.
مالىمەتكە سايكەس، الماتى وبلىسى قاراساي اۋداندىق سوتىندا توپتىق بۇزاقىلىق (قك-ءنىڭ 293-بابى 3-تارماعى بويىنشا) جاسادى دەگەن كۇدىكپەن ايىپتاۋشىلار ن.، و.، ا.-عا قاتىستى قاراساي اۋدانى پوليتسيا باسقارماسىنىڭ «قاماۋدا ۇستاۋ» تۇرىندەگى بۇلتارتپاۋ شاراسىن سانكتسيالاۋ تۋرالى ءوتىنىشحاتى قارالدى.
ءىس بويىنشا جابىرلەنۋشى سوت وتىرىسىندا قازىرگى ۋاقىتتا كۇدىكتىلەرمەن تاتۋلاسقانىن كورسەتىپ، ولاردى قوعامنان وقشاۋلامايتىن بۇلتارتپاۋ شاراسىن قولدانۋدى سۇراعان.
«سوت قپك-ءنىڭ 55, 146-148-باپتارىنىڭ نورمالارىن ەسكەرە وتىرىپ، «قاماۋدا ۇستاۋ» تۇرىندەگى بۇلتارتپاۋ شاراسىن سانكتسيالاۋ ءۇشىن نەگىزدەردىڭ بولماۋىنا بايلانىستى اتالعان بۇلتارتپاۋ شاراسىن سانكتسيالاۋ تۋرالى ءوتىنىشحاتتى قاناعاتتاندىرۋدان باس تارتتى جانە «ەشقايدا كەتپەۋ جانە ءتيىستى مىنەز-قۇلقى تۋرالى قولحات» تۇرىندەگى بۇلتارتپاۋ شاراسىن تاڭدادى»، - دەلىنگەن سوت حابارلاماسىندا.
قاۋلى زاڭدى كۇشىنە ەنگەن جوق.
ايتا كەتەيىك، بۇعان دەيىن الماتى تاۋلارىندا ەندۋرو-موتوتسيكلشىلەرىنە شابۋىل جاسالعانى تۋرالى حابارلادىق.
