ابىز اقساقال، اكادەميك، فيلوسوف، ارداگەر دوسمۇحامبەت كىشىبەكوۆ 100-گە تاياعاندا ومىردەن وزدى، دەپ حابارلايدى “ادىرنا” ۇلتتىق پورتالى. بۇل تۋرالى داۋرەن داريابەك جەلىدە ءبولىستى.
دوسمۇحامبەت كىشىبەكوۆ 1925 جىلى شيەلى اۋدانىندا تۋعان. عالىم، فيلوسوفيا عىلىمدارىنىڭ دوكتورى (1965), پروفەسسور (1967), قازاقستان ۇلتتىق عىلىم اكادەمياسىنىڭ اكادەميگى (2003), قازاق كسر جوعارعى مەكتەبىنىڭ ەڭبەك سىڭىرگەن قىزمەتكەرى.
دوسمۇحامبەت كىشىبەكوۆ 2-دۇنيەجۇزىلىك سوعىسقا قاتىسقان. قىزىلوردا پەداگوگيكا ينستيتۋتىنىڭ (قورقىت اتا اتىنداعى قىزىلوردا مەملەكەتتىك ۋنيۆەرسيتەتى) تاريح فاكۋلتەتىن بىتىرگەن (1948).
1948 – 49 جىلدارى قىزىلوردا مەملەكەتتىك پەداگوگيكا ينستيتۋتىندا وقىتۋشى، 1949–53 جىلدارى كسرو عىلىم اكادەمياسىنىڭ فيلوسوفيا ينستيتۋتىندا اسپيرانت، 1953 – 64 جىلدارى قازاق پوليتەحنيكالىق (قازۇتۋ) ينستيتۋتىندا كىشى عىلىمي قىزمەتكەر، اعا عىلىمي قىزمەتكەر.
1964 – 96 جىلدارى قازاق ۇلتتىق تەحنيكلىقا ۋنيۆەرسيتەتىنىڭ فيلوسوفيا كافەدراسىنىڭ مەڭگەرۋشىسى قىزمەتىن اتقاردى، 1996 جىلدان وسى ۋنيۆەرسيتەتتىڭ قوعامدىق پاندەر كافەدراسىنىڭ پروفەسسورى.
نەگىزگى عىلىمي ەڭبەكتەرى قازاق حالقىنىڭ تاريحى مەن مادەنيەتىنە، ءداستۇرلى دۇنيەتانىمىنا ارنالعان. حالىقتىڭ وتكەنى مەن بۇگىنىن عىلىمي سارالاپ، ونىڭ دىلىنە، بولمىسى مەن ادەت-عۇرپىنا، دۇنيەگە كوزقاراسىنا فيلوسوفيا تالداۋ جاساپ، فيلوسوفيا تاريحى ماسەلەسىن زەرتتەدى. سونداي-اق، كىشىبەكوۆ وتپەلى كەزەڭدەگى قوعامنىڭ دامۋ زاڭدىلىقتارىن، قوعامدىق قاتىناستاردىڭ جاي-كۇيىن ايقىنداپ، ءبىر قوعامنان ەكىنشى قوعامعا وتۋدە دەمەۋشى فاكتورلار قاجەت ەكەندىگىن نەگىزدەدى.
«دوستىق» وردەنىمەن، بىرنەشە مەدالدارمەن ماراپاتتالدى.
كىشىبەكوۆ 580-نەن استام عىلىمي ەڭبەكتىڭ، سونىڭ ىشىندە 47 مونوگرافيا، وقۋلىق، كىتاپتار مەن كىتاپشالار جازدى.
