7 ساۋىردە شەشەنستاننىڭ اچحوي-مارتان قالاسىندا بەلگىسىز ءجاسوسپىرىم پاترۋلدىك قىزمەت پوليتسەيلەرىنە پىشاقپەن شابۋىل جاسادى. ءبىر پوليتسەي اۋرۋحانادا كوز جۇمدى، تاعى ەكەۋى جارالاندى. كەلەسى كۇنى شابۋىل جاساعان دەپ ايىپتالعان ءجاسوسپىرىمنىڭ ءمايىتى قالا ورتالىعىنداعى الاڭعا قويىلدى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
مەملەكەتتىك مەكەمەلەردىڭ قىزمەتكەرلەرى مەن مەكتەپ وقۋشىلارى ميتينگكە قاتىسۋعا ماجبۇرلەندى.
كۋاگەرلەردىڭ ايتۋىنشا، ءمايىت قانعا بويالعان قاپقا ورالعان كۇيدە الاڭعا جەتكىزىلىپ، كوپشىلىكتىڭ كوزىنشە اشىلعان. ايەلدەردىڭ جىلاعانى، كەيبىرىنىڭ ەسىنەن تانىپ قالعانى تۋرالى حابارلاندى. شارا بارىسىندا جەرگىلىكتى اكىم مەن شاريعات سوتىنىڭ وكىلى ءسوز سويلەگەن.
وپپوزيتسيالىق Telegram-ارنالار تاراتقان ۆيدەولاردا ءمايىت اينالاسىندا جينالعان حالىقتىڭ ابىرجۋلى ساتتەرى بەينەلەنگەن. ءمايىت كەيىن باسقا ورىنعا اۋىستىرىلىپ، سول جەردە دە بىرنەشە ۋاقىت جاتقانى بايقالادى.
بۇل جاعداي قوعامدا ۇلكەن رەزونانس تۋدىردى. رەسەي پرەزيدەنتى جانىنداعى ادام قۇقىقتارى جونىندەگى كەڭەستىڭ مۇشەسى ەۆا مەركاچەۆا مۇنى "ورتاعاسىرلىق قاتىگەزدىك" دەپ اتاپ، مۇنداي ارەكەتتەردىڭ ەشقانداي قۇقىق نورماسىنا ساي كەلمەيتىنىن مالىمدەدى.
رەسپۋبليكا باسشىسى رامزان قادىروۆ شابۋىلدان كەيىن شۇعىل جيىن وتكىزىپ، شابۋىلداۋشىنىڭ تۋىستارىن رەسپۋبليكادان قۋعا بۇيرىق بەردى. ول ولاردىڭ مۇلكىن تاركىلەپ، ساتۋدى جانە بۇل قارجىنى مۇقتاج جاندارعا ءبولۋدى ۇسىندى. ەگەر تۋىستارى ۇرپاعىن توقتاتپاسا، الداعى ءبىر اي ىشىندە الىس تۋىستارىنىڭ دا مۇلكى تاركىلەنىپ، رەسپۋبليكادان شىعارىلادى دەدى.
قادىروۆ شابۋىل جاساعان ءجاسوسپىرىمنىڭ ماسكەۋدەن ورازا ايت مەرەكەسىنە كەلگەنىن مالىمدەدى. ونىڭ ايتۋىنشا، شابۋىل شەتەلدەن – ۋكراينا مەن تۇركيادان باسقارىلعان بولۋى مۇمكىن.
جۋرناليست زاكير ماگومەدوۆ بۇل جاعداي شەشەنستاندا بۇرىننان قولدانىلىپ كەلە جاتقان ۇجىمدىق جازا تاجىريبەسىنىڭ جالعاسى ەكەنىن ايتادى. بىراق ءمايىتتى كوپشىلىككە كورسەتۋ – بۇرىن-سوڭدى بولماعان ارەكەت ەكەنىن اتاپ ءوتتى. "بۇل – ۇرەي تۋعىزۋ ءتاسىلى، وزگەلەرگە ساباق بولسىن دەگەن ەسكەرتۋ", – دەيدى ول.
قازىرگى ۋاقىتتا ءجاسوسپىرىمنىڭ تۋىستارى قۇقىق قورعاۋ ورگاندارىندا ۇستالىپ وتىر. كەيبىر مالىمەتتەرگە قاراعاندا، ولارعا سوعىستا قىزمەت ەتۋ ارقىلى كىناسىن "وتەۋ" ۇسىنىلعان.
كرەمل بۇل جاعدايعا ناقتى تۇسىنىكتەمە بەرمەي، اقپاراتتىڭ وپپوزيتسيالىق ارنالاردان شىققانىن العا تارتتى.
