جازۋشى زەينەپ احمەتوۆا "ەل ارنا" تەلەارناسىنداعى "قىزدار مەن جىگىتتەر" باعدارلاماسىن سىناپ تاستادى، دەپ حابارلايدى "ادىرنا" ۇلتتىق پورتالى ازاتتىق رۋحىنا سىلتەپ.
"ەل ارنا" تەلارناسى مەن تۇرسىنبەك قاباتوۆتىڭ ايەلى ءمولدىر مۇقان باعدارلامادا قازاقتىڭ ايگىلى اسكەري قولباسشىسى باۋىرجان مومىشۇلىن ويىنعا اينالدىرعان.
زەينەپ احمەتوۆا تەلەارنادا كورگەن ءۇزىندى جۇرەگىنە قاتتى باتقانىن جەتكىزدى.
"تاۋەلسىزدىك، ەركىندىك، ءسوز بوستاندىعى دەپ كەيبىرەۋلەر اۋزىنا كەلگەنىن ايتىپ، ويىنا كەلگەنىن سويلەپ، بەيباستىققا بارىپ ءجۇر. ادامنىڭ جانى تۇرشىگەتىن، جان-دۇنيەڭدى قۇلازىتاتىن حاباردى جاناشىر كىسىلەردىڭ ءبىرى جىبەرىپ وتىر. قازاقستانعا بەلگىلى اتامىزدىڭ تىكەسىنەن تىك تۇرعان سۋرەتىنىڭ باسىن ويىپ، ءبىر ايەل ادام سول جەرگە باسىن سۇعىپ تۇر. وعان اينالاسىنداعىلار تىرقىلداپ كۇلىپ، ءماز بولىپ وتىر. بۇل نە دەگەن باسسىزدىق، نە دەگەن تەكسىزدىك؟! ارۋاقپەن ويناپ، اتانىڭ ارۋاعىن تاپتاپ، باسىن جۇلىپ الۋعا كىم ولارعا مۇنداي قۇقىق بەرىپ وتىر؟” - دەپ جاۋاپ بەردى.
باعدارلاما بارىسىندا ءمولدىر مۇقان باۋىرجان مومىشۇلىنان كەشىرىم سۇراپ، سالەم سالعان. الايدا زەينەپ احمەتوۆا بۇل ءىستى جايىنا قالدىرمايتىنىن ايتادى.
"ال ەندى وسى حاباردى جاساپ وتىرعان جاپ-جاس كىسىلەر تيتتەي دە بولسىن، ويلانعان جوق پا؟ قۇدايدان قالاي قورىققان جوق؟ ارۋاقتان قالاي سەسكەنگەن جوق؟ ولار ۇلكەندى سىيلاۋدى، اسىرەسە ارۋاقتى سىيلاۋدى ۇيرەنگەن جوق پا؟ باسىنان باستاپ ۋىزىنا جارىماعان بەيشارالار ءوزىنىڭ تاريحىنا ءوزى تۇكىرىپ وتىر. ۇلى ادامداردى اياققا تاپتاپ وتىر. ال بۇل جاقسىلىققا اپارمايدى.
ول قۇرداسى ما نەمەسە جولداسى ما ەدى؟ باسقا ادام تابىلماي قالدى ما؟ ول سۋرەت بۇكىل قازاقستانعا بەلگىلى. الماتىعا جولى تۇسكەن كىسىلەر ادەيىلەپ ۇيگە كەلىپ، سۋرەتكە ءتاۋ ەتىپ، سۋرەتكە ءتۇسىپ، ەسكەرتكىش رەتىندە الىپ كەتەدى. بۇل – بالالارىن الىپ كەلىپ، ەرتەڭگى كۇنى اتاسىنىڭ قاسىندا تۇسكەنىن، سول شاڭىراقتا بولعانىن كورسەتۋ ءۇشىن اتۋىرلەيتىن سۋرەت.
ەگەر تۇپتەپ بارار بولساق، سوتقا بەرۋگە بولادى. ول كىسى قازاقتىڭ ار-نامىسىن تۋ ەتىپ ۇستاعان، ۇلتتىق رۋحتىڭ سيمۆولى بولادى. سونى تۇسىنبەگەن مىنا جاستار ەرتەڭگى كۇنى ەلگە بىرنارسە بەرەدى دەگەنگە سەنبەيمىن. مەن ولاردى ءتىپتى اتا-انادان تاربيە كورمەگەن، تەكسىز دەپ ويلايمىن.
وزگەسى وزگە، باقيلىق بولعان ارۋاقتاردى، ونىڭ ۇستىنە بۇكىل حالىق قادىرلەيتىن ۇلى تۇلعالارىن مازاقتاۋ ەشكىمدى ەشقاشان جاقسىلىققا اپارمايدى. ءبىر كۇن بولماسا ءبىر كۇنى وماقاسىپ، قابىرعالارى قاۋساپ ءتۇسۋى مۇمكىن. ءوسىپ كەلە جاتقان بالا-شاعالارى بار. نەگە قۇدايدان قورىقپايدى؟! مەن بۇل ءىستى جاي قالدىرا المايمىن. ويتكەنى ۇلتتىڭ ۇلى ادامىن قورلاپ وتىر. ەندى كەلىپ، بولاشاعى الدا جاپ-جاس قىز-كەلىنشەكتەر سول اتانىڭ باسىن ويىپ، جۇلىپ الىپ، وعان ايەلدىڭ باسىن تىعىپ "مىناۋ كىم؟" دەپ سوعان ىرجالاقتاپ كۇلىپ وتىر؟ ارۋاق ەشقاشان كەشىرمەيدى", – دەدى زەينەپ احمەتوۆا.
ايتا كەتەيىك، El arna تەلەارناسى الەۋمەتتىك جەلىدەگى بەينەنى ءوشىرىپ تاستادى.
