Jazýshy Zeınep Ahmetova "El arna" telearnasyndaǵy "Qyzdar men jigitter" baǵdarlamasyn synap tastady, dep habarlaıdy "Adyrna" ulttyq portaly Azattyq rýhyna siltep.
"El arna" telarnasy men Tursynbek Qabatovtyń áıeli Móldir Muqan baǵdarlamada qazaqtyń áıgili áskerı qolbasshysy Baýyrjan Momyshulyn oıynǵa aınaldyrǵan.
Zeınep Ahmetova telearnada kórgen úzindi júregine qatty batqanyn jetkizdi.
"Táýelsizdik, erkindik, sóz bostandyǵy dep keıbireýler aýzyna kelgenin aıtyp, oıyna kelgenin sóılep, beıbastyqqa baryp júr. Adamnyń jany túrshigetin, jan-dúnıeńdi qulazytatyn habardy janashyr kisilerdiń biri jiberip otyr. Qazaqstanǵa belgili Atamyzdyń tikesinen tik turǵan sýretiniń basyn oıyp, bir áıel adam sol jerge basyn suǵyp tur. Oǵan aınalasyndaǵylar tyrqyldap kúlip, máz bolyp otyr. Bul ne degen bassyzdyq, ne degen teksizdik?! Árýaqpen oınap, Atanyń árýaǵyn taptap, basyn julyp alýǵa kim olarǵa mundaı quqyq berip otyr?” - dep jaýap berdi.
Baǵdarlama barysynda Móldir Muqan Baýyrjan Momyshulynan keshirim surap, sálem salǵan. Alaıda Zeınep Ahmetova bul isti jaıyna qaldyrmaıtynyn aıtady.
"Al endi osy habardy jasap otyrǵan jap-jas kisiler tıtteı de bolsyn, oılanǵan joq pa? Qudaıdan qalaı qoryqqan joq? Árýaqtan qalaı seskengen joq? Olar úlkendi syılaýdy, ásirese árýaqty syılaýdy úırengen joq pa? Basynan bastap ýyzyna jarymaǵan beısharalar óziniń tarıhyna ózi túkirip otyr. Uly adamdardy aıaqqa taptap otyr. Al bul jaqsylyqqa aparmaıdy.
Ol qurdasy ma nemese joldasy ma edi? Basqa adam tabylmaı qaldy ma? Ol sýret búkil Qazaqstanǵa belgili. Almatyǵa joly túsken kisiler ádeıilep úıge kelip, sýretke táý etip, sýretke túsip, eskertkish retinde alyp ketedi. Bul – balalaryn alyp kelip, erteńgi kúni atasynyń qasynda túskenin, sol shańyraqta bolǵanyn kórsetý úshin átýirleıtin sýret.
Eger túptep barar bolsaq, sotqa berýge bolady. Ol kisi qazaqtyń ar-namysyn tý etip ustaǵan, ulttyq rýhtyń sımvoly bolady. Sony túsinbegen myna jastar erteńgi kúni elge birnárse beredi degenge senbeımin. Men olardy tipti ata-anadan tárbıe kórmegen, teksiz dep oılaımyn.
Ózgesi ózge, baqılyq bolǵan árýaqtardy, onyń ústine búkil halyq qadirleıtin uly tulǵalaryn mazaqtaý eshkimdi eshqashan jaqsylyqqa aparmaıdy. Bir kún bolmasa bir kúni omaqasyp, qabyrǵalary qaýsap túsýi múmkin. Ósip kele jatqan bala-shaǵalary bar. Nege Qudaıdan qoryqpaıdy?! Men bul isti jaı qaldyra almaımyn. Óıtkeni ulttyń uly adamyn qorlap otyr. Endi kelip, bolashaǵy alda jap-jas qyz-kelinshekter sol Atanyń basyn oıyp, julyp alyp, oǵan áıeldiń basyn tyǵyp "mynaý kim?" dep soǵan yrjalaqtap kúlip otyr? Árýaq eshqashan keshirmeıdi", – dedi Zeınep Ahmetova.
Aıta keteıik, El arna telearnasy áleýmettik jelidegi beıneni óshirip tastady.
