16 جىل بۇرىن تاسجولداعى اپاتتان امان قالعان قاراعاندىلىق وقۋشىلار باتىل پوليتسەيدىڭ ەرلىگىنە قۇرمەت ءبىلدىرىپ، قۇتقارۋشىلارىن ەسكە الدى. بۇل تۋرالى Polisia.kz جاريالادى، دەپ حابارلايدى “ادىرنا” ۇلتتىق پورتالى.
ايتا كەتەيىك، 2008 جىلدىڭ 20 مامىرىندا 130 بالا مىنگەن ءۇش اۆتوبۋس استانادان قاراعاندىعا بەت العان جولدا اپاتقا ۇشىرادى. ولاردىڭ قاۋىپسىزدىگىنە جاۋاپتىلاردىڭ ءبىرى، جول پوليتسياسىنىڭ ينسپەكتورلارى قايرات جۇمابەكوۆ بالالاردى قۇتقارىپ، قازا تاپقان بولاتىن.
– بارلىعى قاس قاعىم ساتتە بولدى. استانا – قاراعاندى تاسجولىندا جۇك كولىگى الدىندا كەلە جاتقان جەڭىل كولىكتى باسىپ وزىپ، ءبىز جەتەگىمىزگە الىپ كەلە جاتقان اۆتوبۋستارعا قاراي قارسى باعىتقا شىقتى. قايرات تەز ارادا شەشىم قابىلداپ، جۇك كولىگى اۆتوبۋسقا سوعىلماۋ ءۇشىن ءوزىمىز مىنگەن قىزمەتتىك اۆتوكولىكپەن توسقاۋىل قويدى. ودان كەيىنگىسى ەسىمدە جوق. مەن جانساقتاۋ بولىمىنە ءتۇسىپ، ول جەردە ءتورت كۇن جاتتىم. ول ءوزىنىڭ قىزمەتىنە ادال بەرىلىپ، تاپسىرمانى انتىنا سايكەس سوڭىنا دەيىن ورىندادى. ەگەر ولاي جاساماعاندا اۆتوبۋستاعى بالالار قازا تاباتىن ەدى، – دەپ وتكەندى ەسىنە الدى قايرات جۇمابەكوۆتىڭ ارىپتەسى دميتري پۋگاچ.
اسىل ازاماتتىڭ ەرلىگى جايىندا تۇسىرىلگەن بەينەفيلم قالاداعى كينوتەاترلاردىڭ بىرىندە كورسەتىلدى. وعان قايرات جۇمابەكوۆتىڭ جارى نازگۇل، ۇلى عالىم، قىزى ديلارا قاتىستى. ءتارتىپ ساقشىسى قۇتقارعان بالالار سول كەزدە 10 جاستا بولسا، بۇگىندە ارقايسىسى ومىردەن ءوز ورىندارىن تاۋىپ، وتباسىلى بولدى. ولار اعالارىنىڭ ەرلىگىن ءبىر ساتكە دە ۇمىتقان ەمەس.
ىشكى ىستەر مينيسترلىگىنىڭ رەسمي وكىلى شىڭعىس الەكەشەۆ قايرات جۇمابەكوۆتىڭ ەرلىگى جايىندا تۇسىرىلگەن بەينەفيلم بارلىق مەكتەپتەردە كورسەتىلىپ، باتىردىڭ قايسارلىعى وسكەلەڭ ۇرپاققا جەتكىزىلەتىنىن اتاپ ءوتتى.
ەسكە سالساق، جول-كولىك وقيعاسىنان كەيىن جۇك كولىگىنىڭ جۇرگىزۋشىسىنىڭ ۇستىنەن قىلمىستىق ءىس قوزعالىپ، ول جەتى جىلعا باس بوستاندىعىنان ايىرىلدى.
