كورەيا رەسپۋبليكاسى حالىق سانىنىڭ ازايۋىنا بايلانىستى ەلدە توتەنشە جاعداي جاريالادى. بۇل تۋرالى پرەزيدەنت يۋن سوك يول ايتتى، دەپ حابارلايدى «ادىرنا» ءتىلشىسى «تاسس»-قا سىلتەمە جاساپ.
«مەن رەسمي تۇردە ۇلتتىق توتەنشە جاعداي جاريالايمىن. ءبىز تۋ دەڭگەيىنىڭ تومەندىگى ماسەلەسى شەشىلگەنشە جالپىۇلتتىق كەشەندى ارەكەت ەتۋ جۇيەسىن قولدانامىز»، - دەدى باسشى.
پرەزيدەنت «تەندەنتسيا وزگەرمەسە، رەسپۋبليكا حالقى جويىلىپ كەتۋى مۇمكىن» دەگەن مالىمدەمە جاسادى.
Yonhap باسىلىمىنىڭ مالىمەتىنشە، سوڭعى ونجىلدىقتا ەل بيلىگى تۋ دەڭگەيىن ارتتىرۋ ءۇشىن ءتۇرلى ىنتالاندىرۋ شارالارىن قولداندى. الايدا تۇرعىن ءۇيدىڭ جوعارى باعاسى، ءبىلىم بەرۋ شىعىندارى جانە ۇزاق جۇمىس ۋاقىتى سياقتى فاكتورلار ازاماتتاردىڭ وتباسىن قۇرۋعا دەگەن ىنتاسىن تومەندەتىپ وتىر.
پرەزيدەنت ساياساتتىڭ ءۇش باسىمدىعىن اتادى: يكەمدى جۇمىس ۋاقىتىن ەنگىزۋ، بالا كۇتىمىن قولداۋ جۇيەسىن جەتىلدىرۋ جانە قولجەتىمدى باسپانامەن قامتاماسىز ەتۋ. اتاپ ايتقاندا، بيلىك 2027 جىلعا قاراي بۇل قۇقىقتى پايدالاناتىن اتا-انالاردىڭ ۇلەسىن قازىرگى 7%-دان 50%-عا دەيىن ۇلعايتۋ ماقساتىمەن دەكرەتتىك دەمالىس ەرەجەلەرىن جۇمسارتىپ، ونى اكەلەرگە ۇزارتۋدى جوسپارلاپ وتىر.
جۇمىس بەرۋشىلەرگە دەكرەتتىك دەمالىستاعى قىزمەتكەرلەردى اۋىستىرۋ ءۇشىن ۋاقىتشا جۇمىسشىلاردى جالداۋعا سۋبسيديالار بەرىلەدى. بالالى وتباسىلار جەڭىلدەتىلگەن يپوتەكالىق شارتتار مەن كەڭەيتىلگەن سالىق جەڭىلدىكتەرىنە يە بولماق.
سونىمەن قاتار «دەموگرافيالىق ستراتەگيانى جوسپارلاۋ مينيسترلىگى» قۇرىلماق. ول دەموگرافيالىق پروبلەمالاردى، سونىڭ ىشىندە تۋ دەڭگەيىنىڭ تومەندىگىن، قارتايۋ مەن كوشى-قون ساياساتىن جەڭۋ ستراتەگيالارىن ازىرلەيدى.
ايتا كەتەيىك، وڭتۇستىك كورەيانىڭ تۋ كورسەتكىشى 2023 جىلى كۇرت تومەندەۋىن جالعاستىرعان ەدى. كورەياداعى ستاتيستيكا باسقارماسىنىڭ مالىمەتى بويىنشا، وڭتۇستىك كورەيالىق ايەلدىڭ رەپرودۋكتيۆتى ومىرىندە دۇنيەگە كەلگەن بالالارىنىڭ ورتاشا سانى 2022 جىلعى 0,78-دەن 0,72-گە دەيىن رەكوردتىق تومەنگى دەڭگەيگە دەيىن تومەندەدى. بۇل پوپۋلياتسيانىڭ تۇراقتى سانى ءۇشىن قاجەتتى ءبىر ايەلگە شاققاندا 2,1-دەن الدەقايدا تومەن.
2024 جىلدىڭ باسىندا جاريالانعان دەرەكتەرگە سۇيەنسەك، وڭتۇستىك كورەيادا 52 246 747 ادام بار.
