جوعارعى كەڭەس قىتاي-قىرعىزستان-وزبەكستان تەمىر جولىن سالۋ تۋرالى زاڭ جوباسىن ءۇش وقىلىمدا ماقۇلدادى، دەپ حابارلايدى "ادىرنا" ۇلتتىق پورتالى فەرعانا اگەنتتىگىنە سىلتەپ.
قىرعىزستان ۇكىمەتىنىڭ ءباسپاسوز قىزمەتى ءۇش مەملەكەتتىڭ ۇكىمەتتەرى اراسىنداعى ءتيىستى كەلىسىمدى راتيفيكاتسيالايتىن قۇجات ءبىراۋىزدان قابىلدانعانىن حابارلادى.
حالىق وكىلدەرىنە كولىك جانە كوممۋنيكاتسيا ءمينيسترىنىڭ ورىنباسارى ىرىسبەك باريەۆ جوبانى تانىستىردى. شەندىنىڭ سوزىنشە تەمىر جول قۇرىلىسى قىرعىزستان ەكونوميكاسىنىڭ دامۋىنا وڭ اسەر ەتىپ، حالىققا كورسەتىلەتىن كولىك قىزمەتىنىڭ كەڭەيۋىنە اسەر ەتپەك. جاڭا ءدالىز ەۋرازيالىق كونتينەنتالدىق كوپىردىڭ وڭتۇستىك تارماعىنا اينالادى جانە وڭتۇستىك-شىعىس ازيا مەن تاياۋ شىعىس نارىعىنا جول اشادى. سونداي-اق، قاشىقتىق پەن ءجۇرۋ ۋاقىتىن قىسقارتۋ ارقىلى تاسىمالداۋدىڭ باسەكەگە قابىلەتتىلىگىن ارتتىرادى.
«بۇل باعىت قىتايدان قىرعىزستانعا، سونداي-اق ورتالىق ازيا مەن تاياۋ شىعىس ەلدەرىنە، سونىڭ ىشىندە تۇركياعا جانە ودان ءارى ەۋروپالىق وداققا جۇك جەتكىزۋدى قامتاماسىز ەتە الادى»، - دەدى باريەۆ.
جوبانى ءۇش ەل بىرلەسە قۇرعان كاسىپورىن جۇزەگە اسىراتىنى بەلگىلى، وندا قىتاي تەمىر جولى ەڭ كوپ ۇلەستىع ياعني 51 پايىزدى الادى. ال قىرعىزستان مەن وزبەكستاننىڭ نەگىزگى مەملەكەتتىك كومپانيالارى ارقايسىسىنىڭ جارعىلىق كاپيتالىندا 24,5 پايىزدان بولادى.
قىتاي بيلىگى تەمىرجول جەلىسىن سالۋعا 2,35 ميلليارد دوللار نەسيە بولسە، قىرعىزستاندىقتارعا 10 مىڭعا جۋىق جۇمىس ورنى اشىلادى دەپ كوزدەلۋدە. ساراپشىلاردىڭ پىكىرىنشە، جاڭا باعىتتىڭ ارقاسىندا رەسپۋبليكا تەك جۇك ترانزيتىنەن جىلىنا شامامەن 200 ميلليون دوللار تابىس تابادى.
