قىتاي ەلىنە گاسترولدىك ساپارمەن بارعان ءانشى قايرات نۇرتاسقا كەيبىر اندەرىن ورىنداۋعا رۇقسات بەرمەگەن. ونەر يەسىنىڭ كونتسەرتى قالاي وتكەنىن پروديۋسەرى، اناسى گۇلزيرا ۇسەنقىزى ايتىپ بەردى، دەپ حابارلايدى “ادىرنا”.
پروديۋسەرىنىڭ سوزىنشە، قىتايلىق بيلىك انشىگە “اۋىرمايدى جۇرەك” اتتى تانىمال ءانىن ورىنداۋعا رۇقسات بەرمەگەن.
“ەگەر تەكسەرۋدەن وتپەگەن اندەر ايتىلىپ، فونوگراممامەن كەتسە، كونتسەرتتى توقتاتىپ، ۇيىمداستىرۋشىعا قوماقتى ايىپپۇل سالىنادى. ءبىزدىڭ الدىمىزدا 2-3 ءانشىنىڭ كونتسەرتىن سولاي توقتاتقان ەكەن. ءاربىر ءاننىڭ ءسوزىن تەكسەرىپ، ۇيعىر حالقىنىڭ قاتتى كۇتكەن “اۋىرمايدى جۇرەك” جانە تاعى 3-4 ءاندى ورىنداۋعا رۇقسات بەرمەدى. جاندى داۋىستا ايتىلۋ جاعى دا تەكسەرىلدى”، – دەدى پروديۋسەر.
سونداي-اق ونەر يەسى قىتايلىق تىڭدارمانعا راقمەت ايتىپ، ىقىلاستارىنا العىس ءبىلدىردى.
“تىڭدارمان قاۋىم ءبىزدى كۇتىپ، تاڭعى 4-كە دەيىن مەيرامحانانىڭ الدىندا وتىردى. وتە كەرەمەت قارسى الدى. نە دەگەن نيەتى ءتۇزۋ ادامدار دەپ تاڭعالىپ وتىرمىن”، – دەپ جازدى گۇلزيرا ۇسەنقىزى.
