مەملەكەتتىك رامىزدەردى قۇرمەتتەۋ – ءار ازاماتتىڭ پارىزى

177

شىلدە ايىندا «ادىرنا» ۇلتتىق-ەتنوگرافيالىق بىرلەستىگىنىڭ ۇيىتقى بولۋىمەن الماتى قالاسىنىڭ ءاربىر اۋدانىندا مەملەكەتتىك رامىزدەردى قولدانۋ ماسەلەسىنە ارنالعان سەمينارلار ءوتتى. الماتى قالاسى قوعامدىق دامۋ باسقارماسىنىڭ تاپسىرىسىمەن ۇيىمداستىرىلعان ءىس-شارالاردى زاڭ عىلىمدارىنىڭ كانديداتى، نارحوز ۋنيۆەرسيتەتى جەكە جانە جاريا قۇقىق كافەدراسىنىڭ دوتسەنتى روزا ءومىرتاي مەن مادەنيەتتانۋشى بەردالى وسپان جۇرگىزدى. زاڭگەر سەميناردا مەملەكەتتىك رامىزدەردى قولدانۋدىڭ قۇقىقتىق جاعىن اڭگىمەلەسە، عالىم تانىمدىق تۇرعىدان وي تولعادى.


«زاڭعا سايكەس مەملەكەتتىك رامىزدەردى ارقايسىسىنىڭ وزىندىك قۇقىقتىق ورنى بار. ەلتاڭبا، تۋ توردە، تازا ورىندا تۇرۋى كەرەك. ولاردى تابالدىرىققا، لاس جەرلەرگە قويۋعا بولمايدى. قازىر نەگە تۋدى بالكونعا ىلۋگە رۇقسات ەتپەيدى دەپ سۇراپ جاتادى. بالكون ءبىزدىڭ ەل ءۇشىن ءتور بولىپ سانالمايدى. ونداي جەرگە كىر جايادى، تەمەكى تارتادى، تەمىر-تەرسەك جينايدى، سوندىقتان بالكونعا تۋ ءىلۋ زاڭعا سايكەس ەمەس» دەيدى ر.ءومىرتاي.


ال مادەنيەتتانۋشى ب.وسپاننىڭ سوزىنشە قازاق تاريحىندا تاڭبالاردىڭ ورنى اسا زور. «قازاق تاريحى تاڭبالاردان قۇرالادى. ۇلان-بايتاق جەرىمىزدە مىڭداعان تاڭبالى ەسكەرتكىشتەر بار. كەزىندە ءار رۋدىڭ، ءار تايپانىڭ دا تاڭباسى بولدى. بابالارىمىز «ەنسىز ەل بولمايدى» دەپ بەكەر ايتپاعان. الەمدە مىڭداعان حالىق بار، سونىڭ 200-دەن استامىنىڭ عانا مەملەكەتتىك رامىزدەرى بار. سول سەبەپتى مۇنىڭ قادىر-قاسيەتىن ۇعىنا بىلەيىك»، دەيدى عالىم.
«ادىرنا» ۇلتتىق-ەتنوگرافيالىق بىرلەستىگىنىڭ ديرەكتورى ارمان اۋباكىر مەملەكەتتىك رامىزدەرگە قاتىستى قۇقىقبۇزۋشىلىقتاردىڭ ءجيى ورىن الىپ جاتاتىنىنا قىنجىلىس ءبىلدىردى.
«مەملەكەتتىك گيمن ورىندالعان ساتتە، قولىن كەۋدەسىنە قويمايتىنداردى دا كورىپ ءجۇرمىز. زاڭعا سايكەس تەك شەتەل ازاماتتارى عانا گيمن شىرقالعان كەزدە قولىن كەۋدەسىنە قويماۋعا قاقىلى. ال قازاقستاندىقتار ونى تىك تۇرىپ قارسى الىپ، قولىن جۇرەك تۇسىنا قويىپ قۇرمەتتەۋ كەرەك» دەيدى بىرلەستىك توراعاسى.
سەمينارلار ءار اۋدانداعى ءار مەكەملەردە ءوتتى. ولاردىڭ اراسىندا سانيتارلىق-ەپيدەميالىق ورتالىق، مەملەكەتتىك مۇراعات، وقۋ ورىندارى، كىتاپحانا، ەمحانالار بار.

 

"ادىرنا" ۇلتتىق پورتالى

پىكىرلەر