Shilde aıynda «Adyrna» ulttyq-etnografııalyq birlestiginiń uıytqy bolýymen Almaty qalasynyń árbir aýdanynda memlekettik rámizderdi qoldaný máselesine arnalǵan semınarlar ótti. Almaty qalasy qoǵamdyq damý basqarmasynyń tapsyrysymen uıymdastyrylǵan is-sharalardy zań ǵylymdarynyń kandıdaty, Narhoz ýnıversıteti Jeke jáne jarııa quqyq kafedrasynyń doenti Roza Ómirtaı men mádenıettanýshy Berdaly Ospan júrgizdi. Zańger semınarda memlekettik rámizderdi qoldanýdyń quqyqtyq jaǵyn áńgimelese, ǵalym tanymdyq turǵydan oı tolǵady.
«Zańǵa sáıkes memlekettik rámizderdi árqaısysynyń ózindik quqyqtyq orny bar. Eltańba, Tý tórde, taza orynda turýy kerek. Olardy tabaldyryqqa, las jerlerge qoıýǵa bolmaıdy. Qazir nege týdy balkonǵa ilýge ruqsat etpeıdi dep surap jatady. Balkon bizdiń el úshin tór bolyp sanalmaıdy. Ondaı jerge kir jaıady, temeki tartady, temir-tersek jınaıdy, sondyqtan balkonǵa tý ilý zańǵa sáıkes emes» deıdi R.Ómirtaı.
Al mádenıettanýshy B.Ospannyń sózinshe qazaq tarıhynda tańbalardyń orny asa zor. «Qazaq tarıhy tańbalardan quralady. Ulan-baıtaq jerimizde myńdaǵan tańbaly eskertkishter bar. Kezinde ár rýdyń, ár taıpanyń da tańbasy boldy. Babalarymyz «Ensiz el bolmaıdy» dep beker aıtpaǵan. Álemde myńdaǵan halyq bar, sonyń 200-den astamynyń ǵana memlekettik rámizderi bar. Sol sebepti munyń qadir-qasıetin uǵyna bileıik», deıdi ǵalym.
«Adyrna» ulttyq-etnografııalyq birlestiginiń dırektory Arman Áýbákir memlekettik rámizderge qatysty quqyqbuzýshylyqtardyń jıi oryn alyp jatatynyna qynjylys bildirdi.
«Memlekettik gımn oryndalǵan sátte, qolyn keýdesine qoımaıtyndardy da kórip júrmiz. Zańǵa sáıkes tek shetel azamattary ǵana gımn shyrqalǵan kezde qolyn keýdesine qoımaýǵa qaqyly. Al qazaqstandyqtar ony tik turyp qarsy alyp, qolyn júrek tusyna qoıyp qurmetteý kerek» deıdi birlestik tóraǵasy.
Semınarlar ár aýdandaǵy ár mekemlerde ótti. Olardyń arasynda sanıtarlyq-epıdemııalyq ortalyq, memlekettik muraǵat, oqý oryndary, kitaphana, emhanalar bar.
"Adyrna" ulttyq portaly
