ۇلتتىق قاۋىپسىزدىك قىزمەتى توراعاسىنىڭ بۇرىنعى ورىنباسارى سامات ءابىشتىڭ 8 جىلعا شارتتى تۇردە سوتتالۋى قانشالىقتى زاڭدى؟ بۇل سۇراققا جوعارعى سوتتىڭ قىلمىستىق ىستەر جونىندەگى سوت القاسىنىڭ توراعاسى نازگۇل راحمەتۋللينا جاۋاپ بەردى، دەپ حابارلايدى “ادىرنا” ۇلتتىق پورتالى.
راحمەتۋللينانىڭ ايتۋىنشا، مۇنداي جاعدايلاردا شارتتى تۇردە سوتتاۋ ءجيى كەزدەسەدى.
"شارتتى جازا ءجيى قولدانىلادى. ول اسا اۋىر قىلمىستار ءۇشىن قولدانىلمايدى، ەگەر جازالاۋ مەرزىمى 12 جىلدان اسقان بولسا، سىبايلاس جەمقورلىق قىلمىستارى ءۇشىن قولدانىلمايدى. ول ادامنىڭ بۇرىن سوتتالعان-سوتىلماعانى، مىنەزدەمەسى، قىلمىس جاساۋ كەزىندە كەلتىرىلگەن زالالدى وتەگەن-وتەمەگەنى ەسكەرىلەدى. شارتتى جازا ءجيى قولدانىلادى، ناقتى تسيفرلاردى قازىر ايتا المايمىن", - دەدى سوت القاسىنىڭ ءتورايىمى پارلامەنت كۋلۋارىندا.
سونداي-اق، ول قىلمىستىق كودەكستىڭ 63-بابىندا شارتتى تۇردە جازا قولدانىلمايتىن قىلمىستاردىڭ ءتىزىمى بار ەكەنىن ايتتى.
"تىيىم سالىنباعان جاعدايدا، شارتتى تۇردە جازا قولدانۋعا نەگىز بار ما، جوق پا، سوت جەكە-جەكە شەشىم قابىلدايدى", - دەدى القا باسشىسى.
