ۋتيلالىمعا نارازى توپ وكىلدەرى وسى الىمعا قاتىستى پەتيتسيانىڭ العاشقى جيىنىنان شىعىپ كەتتى. بۇل تۋرالى كەشە، 13 ماۋسىمدا ازاتتىق راديوسى ۆيدەو جاريالادى، دەپ حابارلايدى “ادىرنا” ۇلتتىق پورتالى.
ۋتيلالىمعا نارازى توپ وكىلدەرى “ۇش ساعات كەڭەسىپ، پەتيتسيا بويىنشا كەلىسە الماعانىن” ايتتى.
پەتيتسيانى قاراعان ۇكىمەتتىك كوميسسيا تالاپتى قابىلداماعان. وسىدان سوڭ پەتيتسيا اۆتورلارى نارازىلىق ءبىلدىرىپ جيىننان شىعىپ كەتكەن. پەتيتسيا اۆتورلارى قاتارىندا ۋتيلالىم ماسەلەسىن كوتەرىپ جۇرگەن سانجار بوقاەۆ بار.
«ءبىز كەلىسىمگە كەلە المادىق. وتىرعانىمىزعا 2-3 ساعاتتاي بولدى. ءبىز ءوزىمىزدىڭ بارلىق ناقتى فاكتى، ارگۋمەنتاتسيامىزدى جەتكىزدىك. بىراق تىڭدايتىن جاق جوق. ءبىز ءارتۇرلى مينيسترلىككە سۇراق قويدىق “سىزدەردىڭ ناقتى وسى ۋتيلالىمعا قاتىستى ۇستانىمدارىڭىز بار ما” دەسەك، ەشكىم جاۋاپ بەرمەيدى. سوندىقتان ءبىز مىناۋ بۇگىنگى وتىرىستى قابىلدامايمىز.
ەرتەڭ ءبارىمىز كوكشەتاۋدا بولۋىمىز كەرەك. ونى قازىر ايتىپ وتىر. سوندا ولاردىڭ ەشقانداي ناقتى جوسپارى جوق. كوكشەتاۋعا زاۋىتقا باراسىزدار، بىراق ەشقانداي تەلەفون الىپ كىرۋگە بولمايدى، دەيدى. ءبىز “سوندا حالىققا ءوندىرىسىمىزدىڭ شىنايى قانداي ەكەنىن كورسەتۋگە بولماي ما” دەپ ەدىك. ء“يا، كورسەتۋگە بولمايدى” دەدى. ولار زاۋىتتاردى وتىرىك جاقسى كورسەتۋ ءۇشىن تيكتوك بلوگەرلەردى الىپ كەلەدى. ولارعا تۇسىرۋگە بولادى، ال بىزگە تۇسىرۋگە بولمايدى ەكەن. سوندىقتان ءبىز بۇگىن كوميسسيانىڭ جۇمىسىنا سەنىمسىزدىك تانىتامىز”، دەدى سانجار بوقاەۆ.
ايتا كەتەيىك، بۇعان دەيىن ءماجىلىس دەپۋتاتتارى دا كولىكتەردى ۋتيلالىم جانە باستاپقى تىركەۋ باعاسىن تومەندەتۋدى ۇسىنعان بولاتىن. ولار ەلىمىزدىڭ كولىك پاركىنىڭ ەسكىرە باستاعانىن – باسقا ەلدەردەن اۆتوكولىكتەردى اكەلۋ كەزىندەگى جوعارى كەدەندىك باج سالىعى ساتىپ الۋشى ءۇشىن تۇپكىلىكتى باعانىڭ وسۋىنە اكەلەتىنىن اتاپ ءوتتى.
24 مامىردا E-Petition.kz رەسمي پورتالىندا جاريالانعان ۋتيلالىمعا قاتىستى پەتيتسياعا قول قويعاندار سانى 50 مىڭنان اسقان.
كەيىن ونەركاسىپ جانە قۇرىلىس مينيسترلىگى ۋتيليزاتسيا الىمى تۋرالى پەتيتسيانى قاراۋ جونىندەگى جۇمىس توبىنىڭ وتىرىسى وتپەگەنىن مالىمدەگەن ەدى.
ۆەدومستۆونىڭ مالىمەتىنشە پەتيتسيانىڭ باستاماشىلارى وتىرىسقا قاتىسۋدان باس تارتقان.
