الماتى قالاسىنىڭ المالى اۋداندىق سوتىندا «قازترانسگاز» باسشىسىنىڭ بۇرىنعى كەڭەسشىسى ءارى «نۇر وتاننىڭ» بۇرىنعى يدەولوگى سانجار بوقاەۆقا قاتىستى قىلمىستىق ءىس بويىنشا سوت جالعاسىپ جاتىر.
27 قازاندا وتكەن سوت وتىرىسىندا «قازترانسگاز» كاسىپوداعىنىڭ بۇرىنعى ءتورايىمى زاۋرەش ماحانوۆا جاۋاپ بەردى. ول بوقاەۆتىڭ وزىنە باعىنىشتى كومپانيالار ارقىلى قاراجات شىعارۋدى جەكە ءوزى قالاي باقىلاعانىن ەگجەي-تەگجەيلى باياندادى.
كاسىپوداق قۇرىلعان ساتتەن باستاپ، ياعني 2017 جىلدان بەرى ونى باسقارعان ماحانوۆا سوتتا اۆتوشەرۋ ۇيىمداستىرۋ ءۇشىن «BM Trust» جانە «We Can» كومپانيالارىن تارتۋ باستاماسىن بوقاەۆتىڭ ءوزى كوتەرگەنىن راستادى. كۋاگەردىڭ ايتۋىنشا، ول ەكى ۇيىمنىڭ دا قۇجاتتارىن قول قويۋ ءۇشىن جەكە ءوزى اكەلەتىن. سوت وتىرىسىنىڭ حاتتاماسىنا ءتۇرلى سومالار كورسەتىلگەن ەكى سمەتاسى بار قىزمەتتىك جازبا قوسا تىركەلگەن.
جاۋاپ الۋ بارىسىندا مەملەكەتتىك ايىپتاۋشى ءىس-شارا بيۋدجەتىن نەلىكتەن جاساندى تۇردە ەكى كەلىسىمشارتقا ءبولۋ تۋرالى شەشىم قابىلدانعانىن توتەسىنەن سۇرادى. كۋاگەر باستى فيگۋرانتتىڭ جيەنى ماديار قالمەنوۆ وعان ساندارى الدىن الا جازىلعان دايىن كەلىسىمشارتتاردى اكەلگەنىن اشىپ ايتتى.
ماحانوۆانىڭ ايتۋىنشا، كاسىپوداق كوميتەتىنىڭ حاتتاماسىندا اۆتوشەرۋدى وتكىزۋگە جاۋاپتى تۇلعا رەتىندە ناق وسى سانجار بوقاەۆ كورسەتىلگەن. ونىڭ تاراپىنان بولعان تولىق باقىلاۋدى تاعى ءبىر دەتال دالەلدەيدى – كۋاگەر ورىندالعان جۇمىستاردىڭ جابۋ اكتىلەرىن تىكەلەي بوقاەۆتىڭ جەكە كابينەتىنەن الىپ وتىرعان. سونداي-اق، ماحانوۆا «We Can» فيرماسىنىڭ ورىندالعان جۇمىس اكتىلەرىن قالمەنوۆ نەمەسە بوقاەۆتىڭ ءوزى اكەلگەنىن قوستى. كاسىپوداق كوميتەتىنىڭ وتىرىستارىندا باسقا تۇلعالار دا ءوز كومپانيالارىن مەردىگەر رەتىندە ۇسىنۋعا قۇقىلى بولعان، الايدا ءىس جۇزىندە باسقا ەشكىمنەن مۇنداي ۇسىنىستار تۇسپەگەن.
زاۋرەش ماحانوۆانىڭ جاۋاپتارى الدىڭعى كۋاگەر – كاسىپوداق كوميتەتىنىڭ حاتشىسى مۇحتار ءامىرحانوۆتىڭ سوزدەرىن راستايدى. وتكەن وتىرىستا ول بوقاەۆتىڭ ءوز جيەنىنە باعىنىستى «BM Trust» كومپانياسىن جالداۋدى ءوزى ۇسىنعانىن اتاپ وتكەن. مەملەكەتتىك ايىپتاۋشىنىڭ مالىمەتىنشە، بۇل سحەما كاسىپوداقتان 42 ميلليون تەڭگەنى جىمقىرۋعا مۇمكىندىك بەرگەن، كەيىننەن بۇل قاراجات بوقاەۆتىڭ جيھاز بيزنەسى ارقىلى زاڭداستىرىلعان.
ەستەرىڭىزگە سالا كەتەيىك، «قازترانسگاز» باس ديرەكتورىنىڭ بۇرىنعى كەڭەسشىسى سانجار بوقاەۆ قىلمىستىق كودەكستىڭ بىردەن بەس بابى بويىنشا ايىپتالىپ وتىر: اسا ءىرى مولشەردەگى الاياقتىق، قىلمىستىق كىرىستەردى زاڭداستىرۋ، ۇرلىق، اعاشتاردى زاڭسىز كەسۋ جانە كورىنەۋ جالعان اقپارات تاراتۋ. ونىڭ جيەنى ماديار قالمەنوۆكە الاياقتىق پەن اقشانى جىلىستاتتى دەگەن ايىپ تاعىلسا، جەكە موبيلوگرافى ۇلان نۇسىپقوجاعا ۇرلىق، اعاشتاردى كەسۋ جانە جالعان مالىمەتى بار كونتەنت تاراتۋ ايىبى تاعىلعان.
