بۇگىن، 15 شىلدە الماتىدا ۋتيل الىمى ماسەلەلەرى جونىندەگى پەتيتسيا بويىنشا قوعامدىق تىڭداۋ ءوتتى. بۇل تۋرالى ونەركاسىپ جانە قۇرىلىس مينيسترلىگىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
قوعامدىق تىڭداۋعا قر وقم، مۇددەلى مينيسترلىكتەر مەن ۆەدومستۆولاردىڭ، سالالىق قاۋىمداستىقتاردىڭ، كولىك وندىرۋشىلەردىڭ وكىلدەرى، پارلامەنت دەپۋتاتتارى، بەلسەندىلەر مەن قوعام بەلسەندىلەرىنىڭ باستاماشىل توبى قاتىستى.
ونەركاسىپ جانە قۇرىلىس مينيسترلىگى ينتەگراتسيا جانە حالىقارالىق ىنتىماقتاستىق دەپارتامەنتىنىڭ ديرەكتورى ادىلبەك بەكتىباەۆ «ۋتيل الىمىنا جول جوق» قوزعالىسى 2019 جىلدىڭ جەلتوقسانىندا قۇرىلعانىن، الايدا اۆتوكولىكتەرگە ۋتيل الىمى ءۇش جىل بۇرىن ەنگىزىلگەنىن اتاپ ءوتتى. 2019 جىلى ۋتيل الىمى اۋىل شارۋاشىلىعى تەحنيكاسىنا ەنگىزىلگەن.
«ۋتيل الىمىنا قارسىلاردىڭ نەگىزگى شاعىمدارىنىڭ ءبىرى اۆتوكولىك وندىرۋشىلەرى كتس تولەمەيدى دەگەن ايىپتاۋ بولدى. دەگەنمەن، سوڭعى بەس جىلدا اۆتوموبيل ونەركاسىبى كاسىپورىندارى كتس-ءتى قوسقاندا بيۋدجەتكە 116 ملرد تەڭگە سالىق تۇسىرگەن. قازاقستاندىق اۆتووندىرۋشىلەرگە حالىقارالىق ستاندارتتارعا سايكەس كەلەتىن ناقتى لوكاليزاتسيا تالاپتارى قويىلىپ، ونەركاسىپتىك قۇراستىرۋ بويىنشا كەلىسىم-شارت مىندەتتەمەلەرىنىڭ ورىندالۋى جانە اۆتووندىرۋشىلەردىڭ سالىق پەن كەدەن زاڭناماسىن ساقتاۋى قر وقم، قر قم مەملەكەتتىك كىرىستەر كوميتەتى جانە باسقا دا ۋاكىلەتتى ورگانداردىڭ تۇراقتى باقىلاۋىندا»، - دەدى بەكتىباەۆ.
ول سونداي-اق بەلسەندىلەردىڭ «ۋتيل الىمى وليگارحتاردىڭ قالتاسىنا تۇسەدى» دەگەن ءسوزىن جوققا شىعاردى. وقم وكىلىنىڭ ايتۋىنشا، «جاسىل دامۋ» اق بارلىق قىزمەتى تۋرالى ەسەپتەردى، سونىڭ ىشىندە اۋديتتەن وتكەن قارجىلىق ەسەپتىلىكتى جاريالايدى. وسىلايشا، اق جۇمىسى ايقىن جانە اشىق.
بەكتىباەۆ باستاماشى توپتىڭ قازاقستاننىڭ اۆتوموبيل ونەركاسىبىنە قاتىستى، ونىڭ ەكونوميكالىق تۇرعىدان ءتيىمسىز جانە دۇرىس دامىماي جاتقاندىعى تۋرالى مالىمدەمەلەرىنە دە قارسى دالەلدەر كەلتىردى.
«تەك 2023 جىلى قازاقستاندا 150 مىڭعا جۋىق اۆتوكولىك شىعارىلدى، 2022 جىلمەن سالىستىرعاندا بۇل 30%-عا ءوستى. ...2025 جىلدىڭ سوڭىنا دەيىن جيناقتاۋشى بۇيىمداردى ءوندىرۋ بويىنشا 10 جوبانى جۇزەگە اسىرۋ جوسپارلانۋدا، ناتيجەسىندە وندىرىلگەن ءونىمنىڭ وزىندىك قۇنى تومەندەيدى. جاڭا جوبالارعا سالىنعان ينۆەستيتسيانىڭ جالپى كولەمى 760 ملرد تەڭگەدەن اسادى، ونىڭ ىشىندە اۆتوموبيل بولشەكتەرىنە 403 ملرد تەڭگە”، – دەدى ول.
سونىمەن قاتار، ادىلبەك بەكتىباەۆ ءۇشىنشى ەلدەردەن اۆتوكولىكتى زاڭسىز اكەلۋگە جول بەرمەۋ ماقساتىندا قر وقم تاراپىنان ۇسىنىستارىن ايتتى.
ودان بولەك،تالقىلاۋ قورىتىندىسى بويىنشا ادىلبەك بەكتىباەۆ پەتيتسيا شەشىمىنىڭ الدىن الا جوباسىن ۇسىندى.
ايتا كەتەيىك، بۇعان دەيىن ۋتيلالىم تۋرالى اۆتوساراپشى سۇڭقار تۇرسىنۇلىنىڭ پىكىرىن جاريالاعان ەدىك.
