«سەمەي ورمانى» اۋماعىندا تاعى ءبىر ءورت شىقتى، دەپ حابارلايدى “ادىرنا” ۇلتتىق پورتالى.
«اباي اۋدانىنىڭ ءورت ءسوندىرۋ قىزمەتىنە «سەمەي ورمانى» رمۋ گلپر ءنوۆوشۋلبى بولىمشەسىنىڭ ورتالىق ورمان شارۋاشىلىعى ۋچاسكەسىنىڭ اۋماعىندا ورماندى القاپتا ورمان ءورتى ورىن العانى تۋرالى حابارلاما ءتۇستى. وقيعا ورنىنا «سەمەي ورمانى» مم قىزمەتكەرلەرى، سونداي-اق وبلىستىق توتەنشە جاعدايلار دەپارتامەنتىنىڭ كۇشتەرى مەن قۇرالدارى شىقتى. ورمانشىلار جالپى الاڭى 0,03 گەكتار جەردە قۇرعاق ءشوپ جانىپ جاتقانىن انىقتادى. جەدەل-ىزدەستىرۋ شارالارى بارىسىندا كىنالى انىقتالدى»، - دەلىنگەن توتەنشە جاعدايلار مينيسترلىگىنىڭ سەنبى كۇنى تاراتقان حابارلاماسىندا.
ءورتتىڭ شىعۋىنا كىنالى تراكتورشى بولىپ شىقتى.
«تراكتور يەسى، بوروۆليانكا اۋىلىنىڭ تۇرعىنى قر اقبتك-ءنىڭ 367-بابىنىڭ 3-بولىگى (ورمانداعى ءورت قاۋىپسىزدىگى تالاپتارىن جانە سانيتارلىق ەرەجەلەردى بۇزۋ) بويىنشا اكىمشىلىك جاۋاپكەرشىلىككە تارتىلدى. وعان 184 600 تەڭگە كولەمىندە ايىپپۇل سالىندى»، - دەپ ءتۇسىندىردى توتەنشە جاعدايلار مينيسترلىگى.
