پارلامەنت ءماجىلىسىنىڭ دەپۋتاتى رينات زايىتوۆ شەتەلدەن اكەلگەن كولىكتەرگە تولەنەتىن ۋتيليزاتسيا الىمىنا قارسى پەتيتسياعا قول قويعانىن ايتتى، دەپ حابارلايدى «ادىرنا» ءتىلشىسى.
«مەن قارسى پەتيتسياعا قوسىلعانمىن. ۋتيلالىمنىڭ ناتيجەسى قايدا؟ اقشاسى قايدا كەتىپ جاتىر؟ زاۋىتتار قايدا؟ سودان كەيىن ونى قالاي ەسەپتەپ وتىر؟ نەگە ءبىز قيت ەتسە حالىقتى قاناي بەرەمىز؟ اۋىل شارۋاشىلىعى تەحنيكاسىنا ەڭ بولماسا، رۇقسات ەتسىن دەدى عوي. بۇل اۋىل شارۋاشىلىعى سالاسىنا دا ۇلكەن بوگەت جاساپ وتىرعان نارسە عوي»،—دەدى ول.
سونداي-اق دەپۋتات بۇل ماسەلەنى ارنايى كوميتەت قاراستىرىپ جاتقانىن اتاپ ءوتتى.
«ءبىزدىڭ كوميتەتتىڭ اتىنان بۇل ماسەلەمەن دەپۋتات سارسەنعاليەۆ اينالىسۋدا. ءوزىمىزدىڭ دە كىرگەن كوميسسيامىز كوپ بولىپ تۇر. 50 مىڭ ادام نارازىلعىن باسقاشا بىلدىرسە نە ىستەيمىز؟ قازىر بۇرىنعىداي حالىقتىڭ بەتىنە تۇكىرىپ قويىپ وتىرا بەرەتىن زامان ەمەس قوي. ناتيجە قايدا؟ كورسەتسىنشى، ءبىز دە كەلىسەيىك»، — دەدى زايىتوۆ.
ايتا كەتەيىك، پرەزيدەنت قاسىم-جومارت توقاەۆ 2023 جىلى قازان ايىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قوعامدىق باقىلاۋ، اكىمشىلىك راسىمدەردى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا قول قويعان ەدى. بۇل زاڭ بويىنشا 50 مىڭنان اسا داۋىس جيناعان پەتيتسيانى ۇكىمەت قاراۋعا ءتيىس.
24 مامىردا E-Petition.kz سايتىندا ۋتيلالىمدى الىپ تاستاۋ تۋرالى پەتيتسيا جەتكىلىكتى قول سانىن جينادى. ال 4 ماۋسىمدا ونەركاسىپ جانە قۇرىلىس مينيسترلىگى ۋتيلالىم ماسەلەلەرى بويىنشا پەتيتسيانى قاراۋ جونىندەگى جۇمىس توبىنىڭ قۇرامىن بەكىتكەن بولاتىن.
6 ماۋسىمدا ونەركاسىپ جانە قۇرىلىس مينيسترلىگىندە ۋتيل الىمى ماسەلەلەرى بويىنشا پەتيتسيانى قاراۋ جونىندەگى جۇمىس توبىنىڭ ءبىرىنشى وتىرىسى ءوتۋى ءتيىس بولاتىن. ونىڭ قۇرامىنا پارلامەنت دەپۋتاتتارى، ونەركاسىپ جانە قۇرىلىس، ەكولوگيا جانە تابيعي رەسۋرستار، قارجى، اۋىل شارۋاشىلىعى، تسيفرلىق دامۋ، يننوۆاتسيالىق جانە اەروعارىش ونەركاسىبى، مادەنيەت جانە اقپارات ۆيتسە-مينيسترلەرى، سىرتقى ىستەر ءمينيسترىنىڭ ورىنباسارلارى، باسقا دا مۇددەلى مەملەكەتتىك ورگانداردىڭ وكىلدەرى كىردى. الايدا وتىرىس پەتيتسيا باستاماشىلارىنىڭ وتىرىسقا قاتىسۋدان باس تارتۋىنا بايلانىستى وتپەي قالدى.
