ازەربايجان مەن رەسەي 2024 جىلعى جەلتوقساندا AZAL ۇشاعىنىڭ اپاتىنا بايلانىستى قايعىلى وقيعانىڭ سالدارىن رەتتەۋ جونىندە كەلىسىمگە كەلدى. بۇل تۋرالى ەكى ەلدىڭ سىرتقى ىستەر مينيسترلىگى ايتتى، دەپ حابارلايدى «ادىرنا» ءتىلشىسى.
«2025 جىلعى 9 قازاندا دۋشانبە قالاسىندا وتكەن كەزدەسۋدە ازەربايجان رەسپۋبليكاسى مەن رەسەي فەدەراتسياسى پرەزيدەنتتەرى قول جەتكىزگەن ۋاعدالاستىقتارعا سايكەس، تاراپتار سالداردى ءتيىستى تۇردە رەتتەۋ جونىندە، سونىڭ ىشىندە وتەماقى تولەۋ ماسەلەسى بويىنشا كەلىسىمگە كەلدى»، – دەلىنگەن مالىمدەمەدە.
مالىمدەمەگە سايكەس، قايعىلى جاعدايعا رەسەي فەدەراتسياسىنىڭ اۋە كەڭىستىگىندە اۋە قورعانىسى جۇيەسىنىڭ ابايسىزدا ىسكە قوسىلۋى سەبەپ بولعان.
قابىلدانعان شەشىمدەر وداقتاستىق قاتىناستار نەگىزىندە ىنتىماقتاستىقتى ودان ءارى دامىتۋعا دەگەن ەكىجاقتى ۇمتىلىستى كورسەتەتىنى اتاپ ءوتىلدى.
مالىمدەمەدە سونداي-اق قازا تاپقانداردىڭ وتباسىلارىنا تاعى دا كوڭىل ايتىلدى.
ەسكە سالايىق، 2024 جىلعى 25 جەلتوقساندا باكۋ–گروزنىي باعىتىنداعى J2-8243 رەيسىن ورىنداعان «Azerbaijan Airlines» (AZAL) اۋە كومپانياسىنىڭ Embraer 190 ۇشاعى اقتاۋ قالاسىنان 3 شاقىرىم جەردە اپاتقا ۇشىراعان ەدى. وقيعا سالدارىنان 38 ادام قازا تاۋىپ، 29-ى ءتۇرلى جاراقات العان. قازا تاپقان 38 ادامنىڭ التاۋى – قازاقستاننىڭ، 25 ادام – ازەربايجاننىڭ، جەتەۋى - رەسەي ازاماتتارى.
تەرگەۋدىڭ الدىن الا دەرەكتەرىنە سايكەس، گروزنىي قالاسىنا قونۋعا جاقىنداعان كەزدە ۇشاق رەسەيدىڭ «پانتسير-س» اۋە قورعانىسى جۇيەسىنىڭ شابۋىلىنا ۇشىراعان.
